Макияж узоқ вақт туриши учун 5 тавсия

Уйдан бўяниб чиқиб кетиб, кечки пайт концерт, театр ёки бошқа тадбирга ташриф буюриши керак бўлган, аммо макияж узоқ вақт давомида бузилиб кетмаслиги учун нима қилиш кераклигини билмайдиган аёл-қизларга бу борада қўл келадиган тавсияларни ҳавола этамиз.

Терини макияжга тайёрлаш

Макияждан аввал терини яхшилаб тайёрлаш керак. Юз териси яхшилаб тозаланган, намлантирилган бўлиши, унга суртилган тональ крем юзда текис ва силлиқ туриши керак. Териси кўчганларга пилинг ёки мева кислотали терини тозалайдигандан воситалардан фойдаланиш тавсия қилинади. Яхшилаб тозалагандан кейин юзга намлантирувчи крем суртинг. Орадан 1-2 дақиқа ўтганидан кейин эса праймер ёки тональ крем суртинг.

Тональ крем

Тональ кремни юз ранги ва терининг ёғлилик даражасига мос тушадиганини танлаш керак. Кундалик макияж учун буткул қоплайдиган қуюқ вариантдан фойдаланмаган яхши.

Кўп қатламлилик

Биринчи праймер, кейин консилер, пудра ундан кейин эса румяна ва бронзер, сўнгида помада суртинг. Шундан кейин косметик воситалар юзингизда узоқ вақт туради. Аммо юз ниқоб сингари кўриниб қолмаслиги учун ошириб юбормаслик ҳамда меъёрга амал қилиш керак.

Ялтирамайдиган помада

Кечгача ўчиб кетишини хоҳламасангиз помаданинг ялтирамайдиган вариантидан фойдаланиш тавсия қилинади. Чунки ёғли лаб бўёғи узоқ вақт турмаслиги мумкин. Лабларингиз ялтираб туришини истайдиган бўлсангиз, ёнингизда блеск олиб юринг ва муҳим тадбир ёки учрашувдан аввал суртиб олинг.

Праймер ва фиксатор

Визажистлар праймерни тональ кремдан аввал суртишни тавсия қилади. Бу макияжнинг узоқ вақт туришига ҳисса қўшади. Қовоқ ва лаблар учун алоҳида праймердан фойдаланса ҳам бўлади. Макияж сўнгида фиксатор ишлатишни унутманг. Махсус спрей ишлатилганда юзингиз ялтираб қолмайди, бўёқлар эса оқиб кетмайди.