Кун мавзуси: Комил Алламжоновнинг расмий баёноти сўз эркинлигини чеклаш сифатида баҳоланмоқда

Кун мавзуси: Комил Алламжоновнинг расмий баёноти сўз эркинлигини чеклаш сифатида баҳоланмоқда

Ахборот ва оммавий коммуникациялар агентлиги раҳбари Комил Алламжонов ташкилот ходимлари билан ўтказган матбуот анжуманида сўз эркинлиги ва унинг масъулияти ҳақида сўзлаган. Алламжонов ижтимоий тармоқда эълон қилинган пост муаллифлари изоҳлар учун ҳам жавоб беришини айтди, деб ёзмоқда Тўғри.уз нашри.

Ўзбекистон Президенти администрацияси ҳузуридаги Ахборот ва оммавий коммуникациялар агентлиги раҳбари Комил Алламжонов расмий баёнот билан чиқди. Агентлик раҳбари веб-ресурс эгаси Интернет тармоғига ахборотни жойлаштиришдан аввал унинг тўғрилигини текшириши, шунингдек жойлаштирилган ахборотнинг нотўғрилигини аниқлаган тақдирда уни дарҳол ўчириб ташлаши шартлигини маълум қилган.

Расмий баёнот сўнгида у пост остидаги изоҳлар масаласига ҳам тўхталиб ўтган:

“Бундан буён ҳар бир ОАВ, блогерлар, ижтимоий тармоқлар ва мобил мессенджерлардаги гуруҳлар модераторлари нафақат ўзлари ёзган маълумотларда юқоридаги талабга риоя қилишлари, балки улар остидаги фуқаролар фейк аккаунтлар ёки троллар томонидан ёзилаётган давлат ахборот хавфсизлигига таҳдид солувчи бузғунчи шарҳлар, ҳақоратли сўзлар, таҳқирлашлар, ёлғон изоҳлар учун ҳам қонунда белгиланган тартиб асосида жавобгар бўлишларини эслатиб ўтмоқчимиз.

Сиздан фақатгина қонунчиликдан келиб чиққан ҳолда бундай маълумотларни ўтказмаслик ёки саҳифангиз остида ёзилган бўлса уни зудлик билан ўчириб ташлаш амалиётини йўлга қўйиш сўралмоқда”.

Блогерлар нима дейди?

Расмий баёнотга айрим блогерлар ўз муносабатини билдириб чиққан.

Хусусан, Нурбек Алимов Telegram каналида шундай ёзади:

“Менинг постим остида ёзилган комментарийлар учун мен эмас, ўша комментарийни ёзган одам жавобгар. Пост учун эса мен жавобгар. Кейин қонунда хеч қачон комментларни зудлик билан ўчириб ташлаш ҳақида гап йўқ. Мисол учун, Тошмат блогер ёзган пост остида Эшмат бирорта Ғишмат ҳақида "уни ноқонуний шунча бойлиги бор" деб гапирса ёки ҳақорат қилса, мен у комментарийни ўчирмайман, максимум қўлимдан келадигани бировни ҳақорат қилмаслик бўйича маслаҳат ва тавсия беришим ва бунга қонунда жазо борлигини эслатиб ўтишим мумкин холос".

Блогер Ферузхон Ёқубхўжаев эса видеомурожаат билан чиққан, у икки ойлик либерализм ва сўз эркинлиги тантанаси, демократия ва ҳоказолар учун миннатдорлик билдиришини айтган:

“Бундай сўз эркинлигининг бундай юксак даражасида мен яхшиси шаҳар тарихи ёки французлар қандай яшаётгани ҳақида, юртимизнинг гўзал табиати ҳақида ҳикоя қиламан. Менимча бу тўғрироқ ва хавфсизроқ бўларди. Ҳаммаси ўз ўрнида бўлар эди…

Озодлик тантанасидан энди мантиқ тантанаси томонига ҳаракатланамиз. У ёқда ғалаба қилгандик, бу ерда ҳам ютамиз”.

Яна бир блогер Нозимжон Сафаров ушбу баёнотни сўз эркинлигини чеклаш сифатида баҳоламоқда. 

"Ушбу баёнотнинг ғалатилиги, мантиқсизлиги ва кулгулилигини четга суриб қўйган ҳолда айтиш жоизки, бу сўз эркинлигини чеклашга ҳаракат сифатида баҳоланяпти. Бугун кўпчилик ушбу "сказочный" баёнотдан норози бўлишмоқда. Уларнинг норозилигида жон бор. Ахборот соҳаси бўйича ваколатли орган жамоатчиликка "фақат яхши ёки нейтрал коммент ёзларинг" дея берган сигнали орқага катта қадам. Ферузхон тўғри айтаяпти (https://youtu.be/ZG0zoIayFpU) - ноўрин фикрлашни ҳам тақиқлаш керак". 
 

Бўлимга тегишли қизиқарли хабарлар


Фикр билдириш учун қайдномадан ўтишингиз сўралади, ва телефон ракамни тасдиклаш керак булади!