Кўмирни талон-торож қилганлик учун жавобгарлик кучайтирилади
Бугунги кунда қонунчилигимизда кўмир маҳсулотларини талон-торож қилганлик учун жазо чоралари етарли эмас. Бу эса ушбу маҳсулотларни талон-торож қилиш ҳолатларининг кўпайишига ва бунинг натижасида аҳолининг кўмир маҳсулотига бўлган эҳтиёжини қондиришда муаммолар келиб чиқишига сабаб бўлмоқда.
Эндиликда ушбу ҳолатларни бартараф этиш ва уларга таъсирчан чораларни кўриш мақсадида Ўзбекистон Республикасининг Маъмурий жавобгарлик тўғрисидаги кодексига тегишли ўзгартириш ва қўшимчалар киритиш назарда тутилмоқда.
Яъни, кўмир маҳсулотларини ўғирлаш, ўзлаштириш, растрата қилиш, мансаб лавозимини суиистеъмол қилиш ёки фирибгарлик йўли билан оз миқдорда талон-торож қилиш каби ҳуқуқбузарликлар учун жавобгарлик белгиланмоқда.
Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилишида мазкур тартибларни ўз ичига олган қонун лойиҳаси биринчи ўқишда муҳокама этилди.
Қайд этилганидек, лойиҳада ички ишлар органлари ходимининг ва Миллий гвардия ҳарбий хизматчиси (ходими)нинг қонуний талабларини бажармаслик билан боғлиқ ҳуқуқбузарликлар учун жазо чоралари кучайтирилмоқда.
Муҳокамаларда фракция аъзолари ушбу қонун лойиҳаси аҳолининг кўмир маҳсулотларига бўлган эҳтиёжини тўлақонли қондиришда турли суиистеъмолчилик ва ўғирликларнинг олди олинишига, жамоат тартибини сақлаш фаолиятини олиб бораётган ички ишлар органлари ходимлари ва Миллий гвардия ҳарбий хизматчиларининг қонуний талаблари тўлақонли бажарилишига хизмат қилишини қайд этдилар.
