Кремль Зеленскийни «Путиннинг тинчлик таклифи ҳақида ўйлашга» чақирди

Украина президенти Владимир Зеленский Киев учун ҳарбий вазият ёмонлашгани сабабли Россия етакчиси Владимир Путиннинг тинчлик таклифини кўриб чиқиши керак. Бу ҳақда Россия ОАВларига Россия президенти матбуот котиби Дмитрий Песков маълум қилди.

«Бир вақтлар Зеленский ҳокимиятга тинчлик байроғи остида ва тинчлик ўрнатиш ва Украинани қутқариш ниятида келган. Доим курсисини маҳкам ушламаслигини, Ватаним учун ҳамма нарсага тайёрман, деб гапирарди. Келинг, вазиятни янада ёмонлаштирмаслик учун у ҳамма нарсага тайёрми ёки йўқлигини кўрамиз», — деди Песков.

Унинг сўзларига кўра, «Путин ҳар сафар тинчлик ташаббусларини билдирганида ва сиёсий ва дипломатик каналга киришга уринишлар бўлганида, жойларда маълум шартлар мавжуд бўлади, ҳар сафар улар Украина учун ёмонлашади».

«Фронтдаги вазиятнинг ҳозирги динамикаси украиналиклар учун бундан кейин ҳам ёмонлашишини аниқ кўрсатиб турибди. Эҳтимол, Ватан манфаатларини ўз ва ҳатто хўжайинларидан ҳам устун қўйган сиёсатчи бундай таклиф ҳақида ўйларди», — дея қўшимча қилди Кремль вакили.

Матбуот котибининг таъкидлашича, Россия президенти томонидан билдирилган таклиф «ультиматум эмас, бу ердаги воқеликни ҳисобга олган ҳолда қилинган тинчлик ташаббуси».