Кения президенти Конгога қўшин юборишга чақирди
Шарқий Африка Ҳамжамияти раҳбари ва Кения президенти Ухуру Кенятта Конго Демократик Республикасидаги можарога барҳам бериш учун у ерга қўшин жўнатиш керак, деган фикрда.
Кения ҳукуматидан берилган ёзма баёнотда, Уҳуру Кеняттанинг Шарқий Африка раҳбарлари билан бир неча марта қўнғироқлашгани ва уларни Конго Демократик Республикаси хавфсизлик кучларини қўллаб-қувватлаш учун Итури, Шимолий Киву ва Жанубий Киву вилоятларига қўшин жўнатишга чақиргани билдирилди.
Конго шарқидаги можаролар минтақавий тинчликка жиддий хавф туғдираётганини таъкидлаган Кенятта бу масала Найробида 19 июнь куни ўтказилиши режалаштирилган Шарқий Африка Ҳамжамиятига аъзо давлатлар ҳарбий қўмондонларининг йиғилишида муҳокама қилинишини айтди.
"Мен Конгодаги барча қуролли гуруҳлар зудлик билан қуролларини ташлаб, барча ҳарбий ҳаракатларни тўхтатишга ва сиёсий жараёнда иштирок этишга чақираман", деди Кенятта.
Бундан ташқари, Кения президенти Конго шарқини демилитаризация қилинган ҳудуд деб эълон қилишни таклиф қилди.
Бир неча ҳафтадан бери Конгонинг шарқий қисмида армия ва М-23 гуруҳи аъзолари ўртасида шиддатли тўқнашувлар бўлиб, қуролли гуруҳлар айрим ҳудудларни назорат остига олишга ҳаракат қилмоқда.
