Каз тоғлари: Туркиянинг “ўпкаси”

Каз тоғлари онг ва танани тозалаш учун биринчи бўлиб борадиган табиат мўжизаларидан биридир. Каз тоғлари Туркиядаги кислород миқдори энг юқори бўлган минтақалардан бири бўлган “Каздағи миллий боғи” ҳудудини ўз ичига олган ҳамда ўзининг турар жой марказлари билан аъло дам олишингизни таъминлаб бера оладиган туристик маскандир.

Ажойиб ўрмон манзаралари остида бемалол нафас олишингиз, дўстларингиз билан ёки ёлғиз саёҳатга чиқишингиз мумкин бўлган Каз тоғлари нафақат табиат саргузаштлари, балки мазали овқат ва туристик машғулотларни ҳам амалга оширишингиз учун жуда қулай жой ҳисобланади. Каз тоғларида зиёрат қилинадиган жойлар ва қилишингиз мумкин бўлган туристик машғулотлар мавзусини бошлашдан олдин, минтақа ҳақида маълумотга эга бўлиш ҳам фойдалидир.

Чанаккале ва Баликесир шаҳарлари ўртасидаги кенг минтақага ёйилган Каз тоғлари Бига ярим оролидаги энг баланд чўққи жойлашган тоғ тизмасини ўз ичига олади. Шунингдек, Ида тоғи сифатида ҳам танилган ушбу Каз тоғлари юнон мифологиясида кўплаб афсоналарида зикр этилган. Милоддан аввалги 2000-йилларга бориб тақаладиган ушбу табиат мўъжизаси ўзининг ноёб ўсимлик турлари ва фаунаси билан бой флорага эга бўлиб, қизил доғли гулмоҳи балиғи каби фақат у ерда яшайдиган мавжудотлар мавжуд.

Каз тоғлари қаерда жойлашган?

Мармара ва Эгей минтақалари чегараларида жойлашган Каз тоғлари Чанаккале ва Баликесир вилоятлари ўртасидаги катта майдонни эгаллайди. Тоғларда кўриш мумкин бўлган кўплаб тепаликлар ва тарихий асарлар билан бир қаторда табиати билан машҳур “Каздағи миллий боғи” ҳам бор.

Каз тоғларида амалга оширса бўладиган туристик фаолият турлари

Каз тоғлари “қўлланмаси”ни бу ерда қилинадиган нарсалар билан давом эттирамиз. Шу нуқтада иккита машғулот ажралиб туради: кемпинг (лагер/чодир ўрнатиш) ва қишлоқ саёҳатлари. Каз тоғларининг ажойиб табиати билан бирга бўлиш учун кемпинг учун ташриф буюришингизни тавсия қиламиз. Агарда сиз Каз тоғларида чодир ўрнатишга иккилансангиз ва қулайликни яхши кўрсангиз, бу ерда қолиб табиатдан баҳраманд бўлишингиз учун бу ҳудудда жойлашган кўркам қишлоқлардаги бутик меҳмонхоналар ва ҳостелларни танлашингиз мумкин.

Табиат билан бирлашинг: Каз тоғларининг кемпинг учун муҳташам жойлари

Туркиянинг энг нафис ва табиий гўзалликларига эга жойларидан бири ҳақида гап кетганда, кемпинг машғулотини эслатиб ўтиш табиий ҳолдир. Хавфсиз муҳитни таклиф қиладиган кемпинг масканларида табиатдан завқланиш ва бошқа табиат ихлосмандлари билан мулоқот қилиш мумкин. Каз тоғларининг баъзи лагер майдонлари ўз меҳмонларига дарахт уйларида қолишга имкон беради. Ажойиб онларни тақдим қилувчи саргузаштга нима дейсиз?!

Тоғ миллий боғ мақомига эга бўлганлиги сабабли, сиз бу ерда хоҳлаган жойда чодир қуролмайсиз. Агар сиз қўриқланадиган ҳудудларга “треккинг” қилишни истасангиз, гид ёллашингиз даркор. Миллий боғни муҳофаза қилиш учун масъул бўлган шахслар томонидан бошқариладиган жойлардан ташқари, бу ерда чодирларда ёки карвонларда кемпинг билан шуғулланиш тақиқланади. Ёдингизда тутинг.

Қуйида биз Каз тоғларидаги энг машҳур кемпинг билан шуғулланиш мумкин бўлган ҳамда мукаммал жойларининг номларини қолдирамиз. Агар қизиқсангиз, батафсил маълумот олиш учун бу ерларга масъул органларига мурожаат қилишингиз мумкин:

Ҳизир кемпинг ҳудуди

Акалеос кемпинг ҳудуди

Эндес кемпинг ҳудуди

Жамларалти кемпинг ҳудуди

Органик озуқалар билан детокс: Каз тоғлари қишлоқлари

Каз тоғларидаги қишлоқлар табиат билан ҳамнафас яширин жаннатга ўхшайди. Ушбу қишлоқларнинг аксариятида органик маҳсулотларни топиш мумкин. Сифатли зайтун ёғини, айниқса, Зейтинли каби қишлоқларда топишингиз мумкин. Бу ерга ташриф буюриб, табиатдан завқ олмоқчи бўлсангиз, аммо чодирда вақт ўтказмоқчи бўлмасангиз, бу ҳолда айнан сиз учун Каз тоғлари атрофида 12 та қизиқарли қишлоқ мавжуд бўлиб, у ердаги кичик меҳмонхоналар ёки ҳостелларда истиқомат қилишингиз мумкин:

Ешилюрт

Нусратли

Зейтинли

Таҳтакушлар

Меҳметалан

Кучукчетми

Бейўба

Эски Гуре

Кирачоба

Чамлибел

Арикли