Италия ва Швейцария чегараларини ўзгартирди
Швейцария ва Италия музликлар эриши туфайли Алпдаги чегараларини қайта кўриб чиқди. Ўзгаришлар Церматта ҳамда Валле-д’Аоста вилоятлари чегарасидан ўтган Европадаги энг баланд чўққилардан бири ҳисобланувчи Маттерхорн тоғи атрофидаги ҳудудга тааллуқли, деб хабар беради Bloomberg.
Чегарани қайта кўриб чиқиш Маттерхорн тоғи ёнбағрида жойлашган машҳур Церматт тоғ-чанғи курортига таъсир кўрсатди. Туристлар ва чанғичилар олдингидек Швейцария ва Италия чегарасини бемалол кесиб ўтиши мумкин, аммо чегаранинг ўзи икки давлатнинг иқтисодий манфаатларидан келиб чиқиб Теста Грижиа, Плато Роза ва Гобба ди Роллен тоғлари ёнида ўзгарган.
Швейцарияда музликлар жадаллик билан эришни давом этмоқда. The Guardian маълумотларига кўра, 2024 йилда улар ўз ҳажмининг 4 фоизини йўқотган. 2022 йилда эса уларнинг 6 фоизи эриб кетганди. Олимлар айрим Швейцария чўққиларидаги музларни ўлчашни тўхтатган, чунки улар деярли қолмаган.
Европа музликлари бошқа қитъалардагидан тезроқ эримоқда. Copernicus хизмати маълумотларига кўра, охирги икки йилда улар 10 фоизга қисқарган, 2050 йилга бориб ҳароратнинг исиши 2 даража Целсийдан ошмаса ҳам муз қоплами ярмига камаяди.
