Гитлернинг Канар оролларида махфий клиникаси бўлганми?

Канар оролларидан фашистлар Германиясининг етакчиси Адольф Гитлер яширинган эҳтимолий бошпанаси топилди. Тахминларга кўра, вилла махфий клиника бўлиб хизмат қилган, бу ерда фюрер Иккинчи жаҳон урушидаги мағлубиятидан сўнг пластик жарроҳлиги ўтказилгач, Жанубий Америкага қочган. Бу ҳақда The Sun Secret Nazi Bases (фашистлар махфий базаси дастури)га асосланиб хабар бермоқда.

Нашр муаллифлари Фуэртевентура ороли жанубий чеккасида жойлашган Вилла «Casa Winter»да бўлишди. Минора биноси ичида улар крематорий ва операция хонасини эслатувчи кафелли хона ҳамда туннелни топишди. Тадқиқотчилар Гитлер ўз жонига қасд қилинганини «саҳналаштир»гач, 1945 йил апрель ойи охирида Канар оролларига олиб кетилган, дея ҳисоблашади. У виллага котиб Мартин Борман ва шифокор Йозеф Менгеле билан келган деб тахмин қилинмоқда

Мутахассислар виллани кўздан кечиргач, фашистлар ташқи қиёфасини ўзгартирган ва одил суддан қочиш учун Бразилия ва Аргентинага жўнаб кетишган, деган хулосага келишди.

Вилла немис муҳандиси Густав Винтер томонидан қурилган. Миш-мишларга кўра, лойиҳани фашистлар молиялаштирган ва уруш пайтида сувости кемалари иншоот остидаги бункерларга жойлаштирилган. Бироқ Винтер уйнинг қурилиши урушдан кейин тугаганлигини таъкидлаб, бундай тахминларни рад этди. Объект ҳақидаги архив материаллари австриялик-немис публицисти Алекс Пир томонидан ҳам ўрганилди. Нашрдаги суҳбатда Винтер фашистлар билан боғлиқ бўлгани, аммо уйни оиласи учун қурдиргани, кафелланган хона эса ошхона бўлганини айтди. Ваҳоланки, муҳандиснинг рафиқаси изоляцияланган турмуш тарзини кечирган ва виллага кўчиб ўтишни рад этган.

Айни пайтда виллада Педро Фумеро яшайди. Ҳозирги вилла эгасининг сўзларига кўра, унинг қурилишида қариндошлари қатнашган. Фумеро қариндошларининг ўша пайтлар сўзлаб берган ҳикояларига таянган ҳолда ушбу бино ҳарбий ҳаракатлар билан боғлиқ бўлганлигини тасдиқлади. Мулк эгаси "уйда кўп сирлар яширганига" ва у аниқ кўнгилочар тадбирлар учун мўлжалланмаганига амин бўлганлигини таъкидлади.