Экология вазирлиги ҳузуридаги Жамоатчилик кенгашининг янгиланган таркиби тасдиқланди

29 август куни Экология, атроф-муҳитни муҳофаза қилиш ва иқлим ўзгаришлари вазирлигида вазирлик ҳузуридаги Жамоатчилик кенгашининг навбатдан ташқари йиғилиши бўлиб ўтди. Вазир Азиз Абдуҳакимов раислигида бўлиб ўтган йиғилиш кенгашнинг янги таркибини шакллантириш ҳамда унинг галдаги фаолияти ва истиқболдаги режалари муҳокамасига бағишланди.

Йиғилишда нодавлат нотижорат ташкилотлари, эксперт ва илмий ҳамжамият, оммавий ахборот воситалари вакиллари ҳамда блогерлардан иборат Жамоатчилик кенгашининг янгиланган таркиби тақдим этилди. «Экомактаб» ННТ раҳбари Наталя Шивалдова яна кенгаш раислигига тасдиқланди, «Қалб экологияси» ННТ раҳбари Эшдавлат Сувонов эса унинг ўринбосари этиб тайинланди. Шунингдек, кенгаш таркибига «Меҳр ва оқибат» нодавлат ташкилоти раҳбари Нозимахон Раҳимова, «Яшил қурилиш» бўйича мустақил эксперт Алексей Светлитский, Жаҳон иқтисодиёти ва дипломатия университети доценти Сурия Тўраева, «Falcon» МЧЖ вакили Эркин Йўлдошев, эколог Ферузбек Сайфуллаев, Ўзбекистон Экологик партияси Тошкент шаҳар ташкилоти раиси ўринбосари Шаҳноза Умархўжаева, Ўзбекистон Экофоруми Тошкент шаҳар бўлими раҳбари Зафар Очилов, «Ўзбекистон 24» телеканалининг сиёсий кузатувчиси Дилобар Якубова, Ўзбекистон ҳайвонлар ҳуқуқларини ҳимоя қилиш ташкилотлари коалицияси координатори Елена Бабенко, М.Улуғбек номидаги Ўзбекистон Миллий университети докторанти Шаҳноза Саидова, мустақил мутахассис Нина Пикул, «Эколог.уз» ННТ раҳбари Наргис Қосимова, Биология фанлари фанлари доктори, Ўзбекистон Фанлар академияси Тошкент ботаника боғи ходими Давлатали Абдуллаев, эко-фаол блогерлар Мўътабар Хушвақтова ва Ақида Маҳирова, шунингдек, Қушларни асраш уюшмаси раҳбари Олег Кашкаров киритилди.

Йиғилишда Жамоатчилик кенгаши тўғрисидаги низом атрофлича муҳокама қилиниб, унинг аъзоларининг бурч ва ҳуқуқлари белгилаб олинди, яқин истиқболдаги фаолият режаси кўриб чиқилди. Атмосфера ҳавосининг ифлосланишини мониторинг қилиш ва олдини олиш, табиий ресурслардан оқилона фойдаланиш, ҳайвонларни асраш ва муҳофаза қилиш, экологик таълим, яшил технологияларни ривожлантириш ва бошқа долзарб масалалар бўйича асосий йўналишлар бўйича ишчи гуруҳларни шакллантиришга қарор қилинди.

Вазир Азиз Абдуҳакимов Жамоатчилик кенгаши вазирлик фаолиятини, жумладан, норматив-ҳуқуқий ҳужжатларни тайёрлаш, экологик стартапларни қўллаб-қувватлаш дастурларини амалга ошириш ва бошқа устувор вазифаларни экспертиза билан таъминлашда муҳим роль ўйнаши мумкинлигини таъкидлади. Вазирлик ҳар доим мулоқот ва янги ташаббусларга очиқ экани, бунда жамоатчилик вакилларининг иштироки унинг ишини янада шаффоф ва самарали қилишини таъкидлади.

Вазир ўз нутқи давомида Марказий Осиё атроф-муҳит ва иқлим ўзгаришини ўрганиш университети («Green University») ҳақида ҳам тўхталиб, унинг Ўзбекистонда экологик таълимни ривожлантиришнинг янги босқичи сифатидаги аҳамиятини таъкидлади. Унинг сўзларига кўра, экология ва иқлим ўзгаришлари соҳасида мутахассисларнинг янги авлодини тайёрлаш мамлакат барқарор ривожланишининг муҳим таянчига айланади.

Тадбирлар режасини муҳокама қилиш чоғида вазирликнинг Жамоатчилик кенгаши ва давлат экология инспекцияси аъзолари иштирокида саноат корхоналарида қўшма назорат текширувларини ташкил этиш бўйича таклиф киритилди. Бундай амалиёт қонунбузарликларни тезда аниқлаш ва атроф-муҳит ифлосланишининг олдини олиш имконини беради. Бундан ташқари, вазир вазирлик тузилмавий бўлинмаларининг Жамоатчилик кенгашига мунтазам ҳисобот бериб боришини, шунингдек, уларнинг фаолиятини мустақил баҳолаш амалиётини бирлаштиришни таклиф қилди.

Йиғилиш якунида Жамоатчилик кенгаши фаолиятининг батафсил режасини ишлаб чиқиш бўйича келишувга эришилди, бу долзарб экологик муаммоларни ҳал этиш бўйича тизимли ва самарали ишлар учун асос бўлади.