2018 йилда дунёда доллардаги миллиардерлар сони 2101 нафарни, яъни 2017 йилгига нисбатан 57 нафар камроқни ташкил қилди. Уларнинг умумий бойлиги ҳам 388 млрд долларга камайиб, 8,5 трлн долларни ташкил қилган. Бундай маълумотлар PwC халқаро консалтинг компанияси ва Швейцариянинг UBS банки экспертлари томонидан тайёрланган анъанавий ҳисоботда келтирилган.

Таҳлилчилар бундай салбий натижага “кучли доллар” ва “бозорлар беқарорлиги” сабаб бўлганини айтишган. Барча миллиардерларнинг 233 нафарини аёллар ташкил қилиб, уларнинг сони 5 йил ичида 46 фоизга кўпайган. 

Осиёда миллиардерлар сони 5 йиллик ўсишдан кейин биринчи марта камайган бўлса, АҚШда эса аксинча кўпайган. Осиё-Тинч океанида миллиардерлар сони 2017 йилга нисбатан 7,4 фоизга камайган, аммо умумий ҳисобда ушбу минтақада улар энг кўпни ташкил қилган – 754 киши. Бу борада 2-ўринда Шимолий ва Жанубий Америка бўлиб, ушбу минтақада миллиардерлар 749 нафарни (ўсиш 4,8 фоиз) ташкил қилган. Европалик миллиардерлар сони эса 4,9 фоизга камайиб, 598 нафарни ташкил қилган. 

Давлатлар бўйича олинадиган бўлса, АҚШда бир йил ичида миллиардерлар сони 22 нафарга, уларнинг умумий бойлиги эса 14,3 млрд долларга кўпайиб, 3,111 трлн долларга етган. 

Хитойда эса, аксинча, 2018 йилда 48 киши миллиардерлар қаторини тарк этиб, уларнинг умумий сони 325 нафарни, умумий бойлиги эса 982,4 млрд долларни ташкил қилган. 

Германияда 114 миллиардер бор бўлиб, уларнинг бойлиги 500,9 млрд долларни ташкил қилган.    

Россияда эса миллиардерлар сони бир йилда 3 нафарга камайиб, 98 нафарни, уларнинг умумий бойлиги эса 421 млрд долларни ташкил қилган.