Департамент органлари томонидан ер савдоси билан боғлиқ фирибгарлик ҳолатлари фош этилди

Бош прокуратура ҳузуридаги Департаментнинг Жомбой туман бўлими томонидан ўтказилган тезкор тадбирда, фуқаролар А.Ш. ва И.Х. фуқаро З.нинг хабардорлигисиз унга қарашли 5 сотих ер майдонини ҳамда ушбу ҳудудга туташ ҳокимлик заҳирасидаги яна 5 сотих ер майдонини бошқа бир фуқаро И.га фирибгарлик йўли билан 11 000 АҚШ долларига сотишга келишиб, шундан 10 800 АҚШ долларини олган вақтида ашёвий далиллар билан ушланганлар.

Шу каби, Департамент ҳамда ДХХнинг Тўрақўрғон тумани бўлимлари томонидан ўтказилган тезкор тадбирда, фуқаро Ш.И. фуқаро Р.га “Ч.Б.” фермер хўжалиги фойдаланувида бўлган ер майдонини ўзига тегишли эканлигини айтиб, ушбу ер майдонини унга расмийлаштириб бериш эвазига 3 200 АҚШ доллари ва 75 млн сўмни олган вақтида ашёвий далиллар билан ушланган.

Андижон шаҳар бўлими томонидан ўтказилган терговга қадар текширувда эса, муқаддам судланган Э.П. фуқаро Д.нинг ишончига кириб, Хўжаобод тумани ҳудудида гўёки 8 сотих ер майдони унинг онасига мерос бўлиб қолганлигини айтиб, ушбу ер майдонини унинг номига расмийлаштириб беришни ваъда қилиб, жами 4 250 АҚШ долларини фирибгарлик йўли билан олганлиги аниқланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.