«Central Asian University» университетидаги «ишкал» бўйича расмий баёнот берилди
Ижтимоий тармоқларда «Central Asian University» — собиқ «Акфа University»да икки йиллик тайёргарлик курсларини тамомлаб, дарҳол иккинчи курсга ўқишга қабул қилинган талабалар билан боғлиқ можаро юз бергани ҳақда хабарлар тарқалди. Ҳолат юзасидан «Central Asian University» расмий баёноти берди.
Қайд этилишича, бундан икки йил аввал Акфа университетининг собиқ ректори – 1990 йилда Тошкент шаҳрида туғилган Бекзод Джалилов томонидан «Study for the success» МЧЖни Университет таъсисчисидан яширин ҳолда, фирибгарлик йўли билан ўзига қўшимча маблағ ишлаш мақсадида жалб қилган, амалдаги қонунларга хилоф йўл билан ушбу МЧЖ номидан ота-оналар билан шартномалар тузган.
Шартномага мувофиқ ота-оналарга уларнинг фарзандлари мактабнинг 10-11 синфларида ўқиш билан бир вақтнинг ўзида Акфа университетининг 1-босқичини ўқиб тугатиши ва мактабни битириши биланоқ Университетнинг 2-босқичига қабул қилиниши МЧЖ томонидан ваъда қилинган ва ота-оналар ушбу хизмат эвазига МЧЖ ҳисоб рақамига муайян тўловларни қилишган.
МЧЖнинг ҳисоб рақамига тушган пул маблағлари Б.Джалиловнинг турмуш ўртоғига тегишли бўлган МЧЖ томонидан ўзлаштириб юборилган.
Ушбу иш юзасидан ҳуқуқни муҳофаза қилувчи органлар, хусусан туман прокуратураси томонидан жиноий иш қўзғатилган бўлиб, жабрланувчилар туман прокуратурасига тегишли шикоят билан мурожаат қилишлари мумкинлиги маълум қилинган.
Университетнинг таъкидлашича, Б. Джалиловнинг қонунга хилоф хатти-ҳаракатларидан жабрланган ва қўлида шаҳодатномалари (11 синф) бор болалар тез кунларда, ўрнатилган тартибда Университетнинг 1-босқичига қўшимча қабул қилинади.
