Бухорода фуқарони пичоқлаб ўлдирган кўзи ожиз аёлга суд ҳукми ўқилди

Асли Бухоро шаҳрида туғилган ва бугунги кунда Когон шаҳрида яшаб келаётган 68 ёшли иккинчи гуруҳ ногирони У.О.нинг хатти-ҳаракати юзасидан эълон қилинган суд ҳукми аёлнинг маҳалладошларини анча ташвишлантирди. Бухоро вилояти суди ахборот хизмати раҳбари Феруз Шароповнинг «Xabar.uz»га билдиришича, фуқаро У.О.га нисбатан жорий йилнинг 14 августида Жиноят ишлари бўйича Когон шаҳар суди ҳукми билан Ўзбекистон Республикаси Жиноят кодекси 97-моддасига асосан (қасддан одам ўлдириш) 5 йил озодликдан махрум қилиш жазоси тайинланган.

Суд ҳужжатларига кўра, кўриш имконияти нолга тенг У.О. фақатгина ёруғликни оқ ранг сифатида кўра олади. Бирор қариндоши бўлмагани боис, уйда бир ўзи яшаб келган. Қўшнилари билан яхши муносабатда бўлган, улар аёлнинг ҳолидан хабар олиб туришган.

Жорий йилнинг июнь ойида У.О.нинг қўшниси уйини таъмирлатиш учун рус миллатига мансуб М.М. исмли устани чақирган. У.О. устага қўшнисининг уйлари таъмирини якунлагач, ўзининг ҳам уйи деворларини сувоқлаб беришини илтимос қилган.

Орадан бир неча кун ўтгач, уста фуқаро У.О.нинг яшаш хонадонига келиб таъмирлашни бошлаган. Ярим кундан ҳам кам вақт ичида уста У.О.нинг деворларини сувоқлаб хизмат ҳақини олган. Уй эгасига сув ичишига, овқатланишига кўмаклашган. Устадан меҳр кўрган У.О. у билан дўст тутинган. Кунора чақириб, суҳбатда бўлган. Уста кекса ожиза аёлнинг нафақа пулини олиб келишига ҳам кўмаклашган. Яхши одамлар кўплигидан мамнун бўлган аёл устани дўст сифатида яқин кўриб, олган нафақасидан унга зиёфат беришини билдирган. Бироқ, аёл устанинг дўкондан озиқ-овқатлар маҳсулотларига қўшиб, спиртли ичимлик – ароқ ҳам олганидан хабари бўлмаган. Уйга қайтгач, ошхонада овқат пиширишаётган М.М.нинг нега ароқ олганини ва нега ичаётганини сўраган. М.М. эса ароқ ичаётганини тан олмаган, У.О. эса ароқ борлигини ва уни қуйиб ичаётганини ҳидидан сезганини айтган. Аёлнинг қайта-қайта огоҳлантиришига қарамай, М.М. тинимсиз ичган ва кекса ожизани ҳам ичишга мажбурлашга уриниб, унга ҳатто шилқимлик қила бошлаган.

Бироқ, фаҳшдан йироқ, спиртли ичимлик истеъмол қилмайдиган, жисмоний нуқсони борлиги туфайли турмушга ҳам чиқмаган ожиза ғазабланган: картошка арчаётган қўлидаги ошхона пичоғи билан унга қаршилик кўрсатган. Маст эркак танасининг исталган жойига: чап сон қисмига ва кўкрак қафасига пастдан юқорига қараб, пичоқ уриб, уни қасддан ўлдирган.

Суд мажлисида судланувчи тариқасида сўроқ қилинган У.О. эълон қилинган айбига иқрорлик билдирган. Судда иштирок этган марҳумнинг ўғли Р.М. эса отаси доимий равишда спиртли ичимликлар истеъмол қилиб келиши, айбдорга нисбатан даъвоси йўқлигини ва унга нисбатан қонуний енгиллик сўраб, кўрсатув берган.

Суд ҳайъати У.О.га жазо тайинлашда унинг ёшини, аёллигини, касалманд ва иккинчи гуруҳ ногирони эканлигини, муқаддам судланмаганлигини, жабрланувчининг унга нисбатан даъвоси йўқлигини инобатга олган.