БМТ ўз ходимларини “Спутник V” билан эмланишга чақирди

Бирлашган Миллатлар Ташкилоти (БМТ) ўз ходимларини Россиянинг коронавирусга қарши “Спутник V” вакцинасидан фойдаланишга рухсат берилган мамлакатларда у билан эмланишга чақирди. Бу ҳақда БМТ бош котиби Антониу Гутерриш Москвага ташрифи арафасида Россия ОАВларига берган интервьюсида маълум қилди.

“Биз, албатта, “Спутник” билан эмлаш ишларини ўтказаётган мамлакатларда ишлаётган БМТ ходимларини бу вакцина билан эмланишга чақирамиз”, - деди Гуттереш. Унинг сўзларидан РИА Новости иқтибос келтирган.

Эслатиб ўтамиз, аввалроқ Россия президенти Владимир Путин БМТ Бош Ассамблеясининг 75-сессиясида сўзлаган нутқида ташкилот ходимларига бепул вакцина тақдим этиш таклифини билдирган эди.

“Спутник V” вакцинасидан аллақачон 64 та мамлакатда фойдаланишга рухсат берилган. Бу мамлакатларнинг умумий аҳолиси 3,2 миллиарддан зиёд кишини ташкил этади. “Lancet” халқаро илмий журнал маълумотларига кўра, вакцинанинг самарадорлиги 91 фоиздан юқорироқ. Бу бугунги кунда энг юқори кўрсатгичлардан бири саналади.