АҚШ, Буюк Британия ва Австралия LockBit хакерлар гуруҳи раҳбарига қарши санкциялар жорий қилди

АҚШ, Буюк Британия ва Австралия LockBit хакерлар гуруҳи раҳбари россиялик Дмитрий Хорошевга қарши санкциялар жорий қилди.

АҚШ маълумотларига кўра, эркак 31 ёшда ва Воронежда яшайди. Унга 26 та модда бўйича айблов қўйилган. АҚШ Адлия вазирлиги бутун дунё бўйлаб 2500 дан ортиқ одам LockBit қурбонига айланганини айтди. Буюк Британия расмийлари гуруҳ товламачилик мақсадида қилинган киберҳужумларнинг чорак қисми учун жавобгар деб ҳисоблайди.

АҚШ маълумотларига кўра, Хорошев ўз фаолиятидан камида 100 миллион доллар биткоин олган, фойдаланувчиларга етказилган жами зарар эса 500 миллион долларни ташкил қилган. Давлат департаменти Хорошевни қўлга олишга ёрдам берадиган маълумот учун 10 миллион долларгача мукофот эълон қилди.

LockBit гуруҳи худди шу номдаги вирусни ишлаб чиқди, у компьютерга кирганда, файлларни шифрлайди ва қулфни очиш учун тўловни талаб қилади.