Ал-Шифа касалхонаси директори 54 нафар реанимациядаги беморнинг ўлими ҳақида маълум қилди
Ғазо секторидаги Ал-Шифа касалхонаси директори Муҳаммад Абу Сильмиянинг айтишича, реанимация бўлимида ётган 54 нафар бемор тиббиёт мажмуасини Исроил томонидан қамал қилгани сабабли вафот этган. Бу ҳақда Sky News Arabia нашри хабар бермоқда.
Муҳаммад Абу Сильмиянинг хабар беришича, Исроил қамал бошлангандан бери 54 киши реанимацияда вафот этган. У, шунингдек, ҳозир оғир аҳволда бўлганлар ҳам ҳалок бўлишидан қўрқишини билдирди.
Унинг сўзларига кўра, шифохона бир вақтнинг ўзида қабристон, қамоқхона ва Исроил казармасига айланган. Бир ҳафтадан ортиқ давом этаётган тиббиёт мажмуаси блокадаси туфайли шифохонада сув, кислород ва беморларни даволаш имконияти йўқ.
Эрта туғилган чақалоқлар ҳақида Абу Сильмия: "Агар болалар даволанмаса ва тиббий ёрдам кўрсатилмаса, улар бирин-кетин вафот этадилар", деди.
Аввалроқ Al Hadath телеканали исроиллик ҳарбийлар ҳеч кимга тиббиёт муассасаси биноси ва унга туташ биноларни тарк этишга рухсат бермаётгани ҳақида хабар берган эди.
