Абдураҳмонов ва Чусовитина “Париж-2024”га яқинлашмоқда
Спорт гимнастикачиларимиз Расулжон Абдураҳмонов “Париж-2024” рейтингида учинчи, Оксана Чусовитина олтинчи ўринда бормоқда. Халқаро гимнастика федерацияси хабарида бу ҳақда маълум қилинди.
“Париж-2024” Олимпия ўйинлари яқинлашгани сайин мазкур нуфузли мусобақаларнинг иштирокчисига айланиш учун кураш ҳам қизғин паллага кириб бораверади. Бошқа спорт турлари қатори спорт гимнастикасида ҳам ушбу жараён шиддатли беллашувлар билан ёдда қолмоқда.
Маълумки, спорт гимнастикаси спорт турида ёзги Олимпия ўйинларининг иштирокчиси бўлиш учун спортчилар жаҳон кубоги босқичларида муносиб натижаларга эришиши, зарур рейтинг очколарини жамғариши талаб этилади.
Ўтган ой Миср ва Германияда ўтган жаҳон кубогининг иккита босқич мусобақаларидан кейин Халқаро гимнастика федерацияси “Париж-2024” ўйинларида қатнашиш йўлида ўз йўналишларида Олимпия рейтингининг етакчилари номини эълон қилди.
Спорт гимнастикасининг 6 та эркаклар ва 4 та аёллар йўналишидаги рейтинг кўрсаткичларида Шимолий Корея, Украина, Қозоғистон, Хитой, Япония, Жазоир, Хитой Тайпейи, Озарбайжон, Буюк Британия вакиллари юқори ўринларни эгаллади. Ўзбекистон терма жамоаси аъзоларидан Расулжон Абдураҳимов параллель брусдаги машқ йўналишида рейтингнинг 3-поғонасидан, аёллар ўртасида таяниб сакраш йўналишидаги баҳсларда Олимпия ўйинлари йўлланмаси учун курашга киришган Оксана Чусовитина 6-қатордан жой олди.
Айтиш лозим, ҳамюртимиз Расулжон Абдураҳмонов Германияда ўтган жаҳон кубогининг 2-босқичида бронза медалини қўлга киритган эди. Афсонавий спортчимиз Чусовитина жаҳон кубоги 2-босқич мусобақалари финал баҳсида 6-ўринни эгаллади. Ҳар икки спортчимизнинг ушбу кўрсаткичлари уларни “Париж-2024” сари янада яқинлаштирмоқда, дейиш мумкин.
Олимпия ўйинлари йўлланмаларини тақдим этадиган жаҳон кубогининг 3 ва 4-босқич мусобақалари Озарбайжоннинг Боку ва Қатарнинг Доҳа шаҳарларида бўлиб ўтади.
