10 йилдан сўнг фош этилган жиноят: Шифокор хотинини пичоқда бўлаклаб, тана қолдиқларини ахлат челагига ташлаб юборди

Санкт-Петербург шаҳрида 45 ёшли гинеколог Ирина Земченковани ўлдиришда айбланаётган қотил қўлга олинди. Доктор 2010 йилнинг 23 февраль куни тўсатдан ғойиб бўлган. Унинг турмуш ўртоғи- нефролог шифокор, Мари шифохонаси бўлим бошлиғи Александрнинг айтишича, Ирина ўша куни эрталаб ишга чиқиб кетган, аммо шифохонага етиб бормаган. Уч фарзанднинг онасини кўнгиллилар гуруҳи ҳам излади, «Мени кутгин» кўрсатуви томошабинлари ва хусусий детектив ҳам қидирди. Аммо барча уринишлар бесамар кетди.

Аёл ғойиб бўлгач унинг отаси- таниқли шифокор Геннадий Кононов куёви ишхонада бир аёл билан ишқий муносабатларни бошлаб юборганини билиб қолди. Рафиқасининг ўлимидан тўрт ой ўтиб, Александр ҳамкасб аёл билан курортга дам олишга жўнаб кетди. 8 йилдан сўнг улар никоҳдан ўтишди, бир нафар қизи бор. Ирина вафот этган дейилсада, унинг танаси ҳалигача топилмаган.

Йиллар мобайнида тергов, қидирув ишлари ҳеч қандай натижа бермади. Марҳуманинг отаси Геннадий Кононов қидирув ишлари бўлими бошлиғи Александ Бастрикинга мурожаат қилмагунча шундай эди. Шундан сўнг терговчилар гувоҳларни яна тергов қилишди. Иринанинг ҳамкасблари аёл ўша куни ишхонага келмаганини, ўша куни унинг дам олиш куни бўлганини айтишди. Уй қўриқчиси Ирина ўша куни уйдан чиқмаганини эслади. Унинг сўзларини кузатув камерасидаги ёзувлар ҳам тасдиқлади. Ирина йўқолган пайтда Александр Земченковнинг хуштори бўлгани ҳақидаги далил эса воқеага бошқача ёндашишга мажбур қилди.

Натижада, 2021 йилнинг 31 март куни Александ Земченков ушланди ва терговга тортилди. Ёлғон детектори қўлланди. Ниҳоят, 11 йилдан сўнг шифокор жиноятни тан олди.
– У тергов пайтида хотинини ўлдирмаганини айтди. Айтишига қараганда, хотини зинапояда қоқилиб йиқилиб тушган, шунинг оқибатида ўлган эмиш, – дейди ушбу ишни тергов қилаётган терговчи. – Шундан сўнг у хотинининг мурдасидан халос бўлиш учун жасадни бўлаклаган. Эркакнинг хуштори, айни пайтда хотини бу ҳақда ҳеч нарса билмайди. Земченковнинг янги хотини ҳозирча терговга чақирилмаган.

Земченков хотини Иринанинг танаси бўлакларини чиқинди контейнерига ташлаб юборган. Тергов «Қотиллик» моддаси бўйича жиноят иши қўзғади.