“YouTube” аккаунтини ўғирлаган 17 ёшли йигитча қўлга олинди

Фарғона вилояти, Қўқон туманида яшовчи 20 ёшли Ғ.А. мурожаат қилиб, ўз аризасида “Телеграм” мессенжерида номаълум шахс томонидан 2.500.000 сўм миқдоридаги пул маблағлари фирибгарлик йўли билан ўзлаштирилганлигини маълум қилган.

Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, ушбу жиноятни Фарғона вилояти, Ўзбекистон туманида яшовчи 17 ёшли Т.М. содир этганлиги аниқланди.

Унга кўра, Т.М., Ғ.А. билан “Телеграм” мессенжерида танишиб, унинг “YouTube” видеохостингидаги аккаунтини 2,5 млн.га сотиб олишини айтиб уни алдаб, ушбу аккаунтни бошқариш имкониятини қўлга киритгандан сўнг логин ва парольни ўзгартириб, Ғ.А. билан ёзишмаларни ўчириб юборган ва уни қора рўйхатга киргазиб қўйганлиги маълум бўлди.

Мазкур ҳолат юзасидан Ўзбекистон Республикаси ЖКнинг 168-моддаси 3-қисми "б,г" билан жиноят иши қўзғатилиб, Т.М.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.