Япония бош вазири Ким Чен Ин билан учрашишга тайёр

Япония бош вазири Фумио Кисида БМТ Бош ассамблеясининг 77- сессияси минбарида сўзга чиқиб, Шимолий Корея етакчиси Ким Чен Ин билан учрашишга тайёр эканини маълум қилди.

"Япония бош вазири Дзюнъитиро Коидзуми билан Шимолий Корея етакчиси Ким Чен Ир ўртасида Пхеньян декларацияси имзоланганига 20 йил бўлди.

Ушбу ҳужжатда эълон қилинган масалалар, жумладан, Япония фуқаролари (Шимолий Кореяда 1970-80 йилларда мажбуран ушлаб турилган), ядровий ва ракета дастурлар, қайғули ўтмишни баҳолаш ва муносабатларни яхшилашнинг комплекс ечимлари ҳали ўзгармаган. Япония икки мамлакатни қизиқтираётган барча масалаларни муҳокама қилишга тайёр. Шахсан мен Ким Чен Ин билан учрашишга тайёрман. Мен бирорта ҳам имкониятни қўлдан бермай бор куч-ғайратимни ишга солишга тайёрман", – деди Кисида. Кисида ўтган ҳафта охирида Японияга "Нанмадол" тайфуни ёпирилиши сабабли Нью-Йорк шаҳрига бир кун кечикиб келганди.

20-26 сентябрь кунлари Нью-Йорк шаҳрида БМТ Бош ассамблеясининг юқори даражадаги 77-сессияси бўлиб ўтмоқда.