Венесуэла ва Колумбия Президентлари учрашди
Венесуэла Президенти Николас Мадуро ва Колумбия Президенти Густаво Петро шанба куни ўзаро музокара ўтказди ва сиёсий, савдо-иқтисодий алоқани янада кенгайтиришга келишиб олди. Давлат раҳбарлари Петронинг Венесуэлага расмий ташрифи якуни бўйича “Мирафлорес” президент саройида қўшма декларацияни имзоладилар.
– Биродарлик ва ҳамкорлик, икки мамлакат тинчлиги ва фаровонлиги йўлида олға интиламиз, – деди Мадуро мамлакат телевидениеси (Venezolana de Televisión) эфирида сармоя масаласи, экология, энергетика, нефть-газ соҳаларида самарали келишувларга эришилганини қайд этаркан.
Унинг айтишича, музокарада тинчлик мавзуси, хусусан Колумбиядаги ички низони ҳал қилиш масаласи ҳам кўтарилган.
– Венесуэла Президент Петрони тўлиқ ва мутлақ қўллаб-қувватлайди, чунки Колумбияда тинчлик ҳукмрон бўлса, бизда ҳам осойишталик таъминланади, – дея таъкидлади мезбон раҳбар. – Кўп қиррали ҳамкорлигимиз, ўзаро англашув муносабатимиз янада ривожланиб, режалаштирилган ишлар тўлиқ ва муваффақиятли амалга ошади.
Учрашув чоғида “икки давлат ўртасида реал энергетика интеграцияси тамойили белгилаб олинди. Венесуэла ғарбидаги Сулия штатига электр энергияси узатиш лойиҳаси, табиий газ таъминоти масаласи муҳокама қилинди.
Колумбия Президенти, шунингдек, табиий ҳудудларда туризмни ривожлантириш, фойдали қазилмаларни ноқонуний қазиб олишга қарши курашни кучайтириш тарафдори эканини ҳам билдирди.
