ВАЗИР: «Қилса бўларкан-ку...”

Олий таълим фан ва инновациялар вазири Қўнғиротбой Шарипов ижтимоий тармоқдаги ўз саҳифасида 8-апрель куни давлатимиз раҳбари Жиззах вилоятига ташрифи доирасида Фориш туманидаги тоғ-кон саноатига ихтисослашган “Basalt Uzbekistan” кластери фаолияти билан танишгани юзасидан ўз фикрларини билдириб, бу бўйича таълим йўналишида амалга оширилиши режалаштирилган ишларга тўхталди:

“Талаб ва таклифга асосан квоталаш ишларини режалаштирдик. Мутасаддилар билан музокаралар олиб бориб нечта олий таълим, нечта касб-ҳунар таълимини эгаллаган кадрларга эҳтиёж борлигини аниқлаб, 2024-2025-йиллар қабули бўйича зудлик билан чора-тадбирларни қайта кўриб чиқдик. Келгусида мазкур кластерда ҳаётга татбиқ этилиши кутилаётган 500 миллион долларлик қўшилган қиймати юқори бўлган 20 турдаги янги лойиҳалар эвазига қўшимча 2 мингта иш ўрни пайдо бўлишини ҳисобга олдик.

Янги лойиҳа асосида ишлаб чиқарилган маҳсулот ички эҳтиёжни қоплаш билан бир қаторда, 90 фоизи экспортга йўналтирилиши – малакали мутахассисларни тайёрлаб етказишни олдимизга асосий мақсад қилиб қўяди.

Зеро, илмий асосланган лойиҳаларни малакали кадрлар билан таъминлаш нафақат илмий тадқиқотларни амалиёт билан боғлаш, кластер корхоналарни ривожлантиришга, балки мамлакатимиз барқарор иқтисодиётини янада мустаҳкамлаш, аҳоли фаровонлигини ошириш, даромадли иш ўринларини кўпайтириб аҳолининг камбағал қатламини қисқартиришга хизмат қилади.”