Вадим Абрамов истеъфога чиқди, янги мураббий ким бўлиши ҳозирча номаълум
Ўзбекистон миллий жамоаси бош мураббийи Вадим Абрамов ва мураббийлар штаби истеъфога чиқарилди. ЎФА раҳбари янги мураббий масаласи ҳақида гапирди
ЎФА навбатдаги ташқари конгрессининг иккинчи қисмида Ўзбекистон миллий жамоаси бош мураббийи Вадим Абрамов, Терма жамоалар маркази бошлиғи Азиз Ҳайдаров, миллий жамоамиз сардори Одил Аҳмедовнинг чиқишидан кейин ЎФА президенти Абдусалом Азизов миллий жамоа мураббийлар штаби истеъфога чиқарилганини маълум қилди.
«Вадим Абрамов ва мураббийлар штаби олдига жамоани кейинги босқичга олиб чиқиш вазифаси қўйилган эди. Вазифа уддаланмагани боис, келишувда белгиланганидек миллий жамоа 3-босқичга чиқмагани сабабли мураббий истеъфога чиқади. Вадим Карленович билан бирга мураббийлар штаби билан шартномаларни бекор қиламиз.
Миллий жамоани ким бошқаради, деган савол бир кунлик эмас. Бу масалани футбол фахрийларимиз ва мутахассислар билан муҳокама қиламиз. Ўзимизни ва европалик мураббийлар номзодини кўрамиз. Кейин яна ҳеч қандай баҳона бўлмаслиги керак. Кимлар иш бошлаши ҳақида ҳали яна маълумот берамиз. Миллий жамоа масаласи эса ҳали яна муҳокама қилинади. Шу билан бугунги йиғилишга якун ясаймиз», - деди ЎФА раҳбари Абдусалом Абдумавлонович.
