Uzum ва БМТТД Ўзбекистонда рақамли кўникмаларни ривожлантириш йўлида ҳамкорликни бошлади
Uzum БМТ Тараққиёт Дастури (UNDP) билан ҳамкорлик меморандумини имзолаган Ўзбекистондаги биринчи IТ-компанияси бўлди. Ҳамкорлик доирасида Uzum ва UNDP мутахассислари мамлакат бўйлаб аҳолининг ижтимоий ҳимояга муҳтож қатлам вакилларига молиявий саводхонлик ва тадбиркорлик асосларини ўргатадилар.
Мамлакатда рақамли молиявий хизматлар ва онлайн савдонинг фаол ўсиши кузатилмоқда. Банк-молия хизматларининг нуфузи ҳамда рақамли саводхонлик даражасининг ўсиши, айниқса олис ҳудудлар, у ердаги кичик шаҳарларда яққолроқ кузатилмоқда. Рақамли платформаларнинг ривожланиши ва интернетдан фойдаланиш улушининг ошиши тадбиркорликни ривожлантириш ҳамда янги иш ўринлари яратиш учун қулай имкониятлар яратди.
Uzum Market'да мамлакат бўйлаб ўн мингдан ортиқ корхона ва тадбиркорлар ўз маҳсулотларини сотаётган бўлса, уларнинг 30 фоиздан ортиғини аёллар ташкил этади. Uzum ва БМТТД ишсиз аёллар ва ёшлар ўртасида рақамли ҳамда молиявий саводхонлик кўникмаларининг етишмаслигини бартараф этишда умумий манфаатларга эга. Бу борадаги илк амалий қадам қўшма таълим дастурларини амалга оширишдир. Узум рақамли ва логистика инфратузилмасидан фойдаланиш ҳажмининг ошиши эса бандликнинг ўсиши ва тадбиркорликнинг ривожланишига омил бўлади.
— Биз рақамли саводхонлик ва бизнесни бошқариш асосларини ўргатиш, ушбу кўникмаларни амалга ошириш учун қулай, тушунарли хизматлар кўрсатишга тайёрмиз, — деди Uzum компаниясининг ижрочи директори Роман Лаврентиев. — Молиявий сервислар, бозор майдони, хусусий фойдаланувчилар ва тадбиркорлар учун қулай банк воситаларини ишлаб чиқиш орқали биз, биринчи навбатда, мамлакатимизнинг барча аҳолиси – эркаклар ва аёллар, пойтахт ва олис ҳудудларда истиқомат қилувчи аҳоли учун тенг имкониятлар яратамиз. Айнан мана шу мақсад бизни ва БМТТДдаги ҳамкасбларимизни қўшма лойиҳада бирлаштиради.
— Бизнинг умумий мақсадимиз – ишсизлар ўртасида рақамли ва молиявий кўникмаларнинг етишмаслигини бартараф этиш ва шунга оид тушунчаларни шакллантириб, билимларини ривожлантиришга қаратилган тузилмани яратишдир, — деди БМТ Тараққиёт дастурининг Ўзбекистондаги доимий вакили вазифасини бажарувчи Анас Қарман. — Ушбу ташаббус аёллар ва ёшларга замонавий дунёда зарур бўлган билим ва кўникмаларни беради. Бу эса уларнинг меҳнат бозорида имкониятларини кенгайтиради. Биз Узумʼъни истиқболли салоҳиятга эга узоқ муддатли ҳамкор сифатида кўрамиз. Ушбу экотизимнинг мамлакат иқтисодиёти ривожига қўшган ҳиссаси аллақачон сезилиб турибди. Масалан, сармоядорлар томонидан «Узум»нинг танланиши барқарор ҳамкорликка ишонч бағишлайди ва ҳозирда экотизим Ўзбекистондаги биринчи ва ягона ҳисобланади.
Томонлар электрон савдо учун асосий молиявий саводхонликка йўналтирилган кенг қамровли ўқув материалларини ишлаб чиқиш, шунингдек, республикадаги тажрибали мутахассислар томонидан кўникмаларни самарали тарқатиш ва ҳудудлардаги мақсадли аудиториянинг ушбу билимларни ўзлаштиришини таъминлаш мақсадида семинар ҳамда тренинглар ўтказишга келишиб олдилар.
Бирлашган Миллатлар Ташкилотининг Тараққиёт Дастури (UNDP) Ўзбекистоннинг камбағалликка барҳам бериш, тенгсизликни камайтириш, рақамли тафовутларни бартараф этиш ва инклюзивликни яхшилаш бўйича амалга оширилаётган саъй-ҳаракатларни доимо қўллаб-қувватлайди.
