“Ўзсувтаъминот” AЖнинг “Очиқ маълумотлар” бўлимидаги маълумотлар қайта киритилди
“Ўзсувтаъминот” AЖнинг “Очиқ маълумотлар” бўлимидаги маълумотлар қайта киритилди. Бу ҳақда АОКАда "Ўзсувтаъминот" АЖ раҳбарияти иштирокида ўтказилган матбуот анжуманида маълумот берилди.
Фуқароларнинг ахборотни эркин излаш ва олишга доир конституциявий ҳуқуқларини амалга ошириш, давлат органлари ва ташкилотлари фаолиятининг очиқлиги, шаффофлиги ва ҳисобдорлигини таъминлаш, уларнинг очиқлик борасидаги самарадорлик кўрсаткичларини белгилаш ҳамда фаолиятини илғор халқаро стандартлар асосида баҳолаш тизимини жорий этиш мақсадида ҳукуматимиз томонидан бир неча нормалар татбиқ этилган.
Белгиланган нормаларга асосан 2022-йил якунларига кўра, давлат органлари ва ташкилотларида очиқлик бўйича амалга оширилган ишларнинг самарадорлиги ва натижадорлигини баҳолашга қаратилган Очиқлик индекси 84 та баҳолаш мезонидан таркиб топган 8 та индикатор асосида баҳоланган эди.
Акциядорлик жамияти ва унинг тизим ташкилотлари очиқлик фаолияти даражасини ошириш, ҳисобот ва маълумотлар базасини шакллантириб бориш ва йўл қўйилган камчиликларни бартараф этиш ҳамда 2023-йилги баҳолашда ижобий натижаларни қайд этиш мақсадида бошқарув раисининг тегишли буйруғи чиқарилди. Мазкур буйруқ ҳамда давлат органлари ва ташкилотлари фаолиятининг очиқлик даражасини ошириш бўйича қарорлар ва қонунчилик ҳужжатлари асосида “Ўзсувтаъминот” AЖнинг “Очиқ маълумотлар” бўлимидаги маълумотлар қайта киритилди.
Бугунги кунда акциядорлик жамияти фаолиятига доир очиқ маълумотлар талаб даражасида ресурсларга, яъни очиқ маълумотлар портали ва акциядорлик жамияти расмий веб-сайтига жойлаштирилди. Жумладан, очиқлик порталида (https://data.egov.uz/organizations/720) :
раҳбариятнинг қабул кунлари ва алоқа маълумотлари;
ташкилот ва алоқа каналлари ҳақида маълумотлар;
ташкилотнинг қуйи бўғинлари, филиаллари ва ҳудудий бўлинмалари тўғрисидаги маълумотлар;
мавжуд вакант иш жойлари ҳақида маълумот;
фуқаро мурожаатлари, мурожаат каналлари ва уларни кўриб чиқиш натижалари бўйича маълумотлар;
давлат харидлари тўғрисидаги маълумотлар;
мансабдор шахсларнинг хизмат сафарлари,
тасдиқланган йиллик харажатлар сметаси билан бир қаторда, унинг ижроси ва бошқа шу каби 10 та тўпламдан иборат маълумотлар белгиланган муддатларда жойлаштириб келинмоқда.
Шу билан бир қаторда мазкур маълумотлар ва акциядорлик жамиятига оид бир йиллик умумий ҳисоботлар, давлат бюджети ва халқаро молия институтлари маблағлари ҳисобидан амалга оширилаётган лойиҳалар, тасдиқланган иш режалар, соҳага оид қабул қилинган ёки ўз кучини йўқотган ҳужжатлар, коррупцияга қарши курашиш соҳасидаги ички-идоравий ҳужжатлар ва ўтказилган ҳамда ўтказилиши режалаштирилган тендерлар ҳақидаги очиқ маълумотлар акциядорлик жамиятининг расмий веб-сайтининг “Очиқ маълумотлар” бўлимига жойлаштирилиб келинмоқда. Умуман олганда, ташкилот фаолиятининг очиқ ва шаффофлигини таъминлаш ва белгиланган нормалар асосида эълон қилиб бориш юзасидан керакли чора-тадбирлар ишлаб чиқилиб амалиётга татбиқ этилмоқда.
