ЎзРВБ аукционларида давлат облигациялари бирламчи дилерлар ўртасида жойлаштирилди

ЎзРВБ аукционларида давлат облигациялари бирламчи дилерлар ўртасида жойлаштирилди

2022 йил 3-4 ноябрь кунлари Самарқанд шаҳрида бўлиб ўтган II халқаро иқтисодий форум давомида Ўзбекистон Республикаси Молия вазирлиги, Марказий банк ва 9 тижорат банки ўртасида давлат қимматли қоғозлари (ДҚҚ) бозорида бирламчи дилерлик вазифаларини бажариш бўйича шартномалар имзоланган эди. Шартнома имзолаган банклар қаторига Ўзбекистон Республикаси Ташқи иқтисодий фаолият миллий банки, Ипотека-банк, Халқ банки, Ўзсаноатқурилишбанк, Қишлоқ қурилиш банки, Асака банк, Туронбанк, шунингдек Asia Alliance bank ва Ипак Йўли банки кирди.

Тузилган шартномалар доирасида 2022 йил 29 ноябрь куни Ўзбекистон республика валюта биржаси (ЎзРВБ) савдо платформасида юқорида қайд этилган бирламчи дилерлар ўртасида ДҚҚни жойлаштириш бўйича биринчи аукцион савдолари бўлиб ўтди. Аукционларда жойлаштирилган ДҚҚ сони 560 минг донани ташкил этди.

Шуни ҳам таъкидлаш жоизки, тузилган шартномада бирламчи дилерлар учун Молия вазирлиги томонидан бирламчи савдоларда жойлаштириладиган ДҚҚни сотиб олишнинг минимал миқдори белгиланиши билан бирга, бирламчи дилерларнинг иккиламчи бозорда ликвидликни сақлаш бўйича мажбуриятлари, шунингдек уларнинг фаолиятини рағбатлантириш шартлари кўрсатиб ўтилган.

ДҚҚ бозорида бирламчи дилерларнинг фаолияти, шубҳасиз, иккиламчи бозорни янада ривожланишига, даромадлилик эгри чизиғи шаклланишига, ва бу орқали бозор иштирокчилар сони ошишига ҳамда хорижий инвесторларни жалб қилишга кўмаклашади.

ЎзРВБ давлат облигациялари бозорида барча хизматларни, шу жумладан замонавий платформаларда қимматли қоғозларни жойлаштириш ва муомалага чиқаришни ташкил этиш, ҳисоб-китоб, клиринг ва депозитар хизматларни тақдим этади, бу эса бозор иштирокчилари учун қўшимча савдо стратегияларини яратади.

Аввалроқ, ЎзРВБнинг бирламчи савдоларида хорижий инвестор томонидан давлат қимматли қоғозларини сотиб олиш бўйича илк битимлар тузилган эди.

ЎзРВБ - республиканинг энг йирик ва кўп функцияли биржа платформаси, савдо майдонлари, ҳисоб-китоб ва клиринг тизими ҳамда депозитарийни ўз ичига олган ноёб интеграциялашган тизим бўлиб, валюта, пул ва муддатли бозорларда, шунингдек, давлат қимматли қоғозлари бозорида биржа савдолари ташкилотчиси ҳисобланади.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!