Ўзбекистонлик 10 нафар шахматчи FIDE нинг янгиланган рейтингидан жой эгаллади

Халқаро шахмат федерацияси (FIDE) 2025 йил январь ойи учун дунё шахматчиларининг янгиланган рейтингини эълон қилди.

Эркаклар ўртасидаги янгиланган рейтингнинг юқори ўнлиги деярли ўз ўрнида қолган бўлса, ўтган йил декабрь ойида АҚШда кечган рапид ва блиц бўйича жаҳон чемпионати, Қатарда якунланган нуфузли халқаро турнир каби мусобақаларда қайд этилган натижалар рейтингнинг ўрта ва қуйи поғонасида катта ўзгаришларга сабаб бўлди.

Эътиборли жиҳати, янгиланган рейтингда дунё шахматчиларининг ТОП-100’ талигидан 5 нафар гроссмейстеримиз жой олди.

Норвегиялик Магнус Карлсен (2831) рейтинг пешқадамлигини сақлаб қолди. Америкалик Фабиано Каруана (2803) ва Ҳикару Накамура (2802) кучли учликни якунлади.

Ҳиндистонлик Аржун Эргаиси (2801) ва Доммаражу Гукеш(2777) Нодирбек Абдусатторов(2768)дан олдинги ўринларни эгаллади.

Биринчи рақамли шахматчимиз Нодирбек Абдусатторов 6-ўринда қайд этилган вазиятда Жавоҳир Синдоров (2692) 37, Рустам Қосимжонов (2683) 45, Шамсиддин Воҳидов (2659) 52, Нодирбек Ёқуббоев (2659) 67-поғонада қайд этилди.

Аёллар рейтингининг кучли ўнлигида 5 нафар хитойлик, 2 нафар россиялик, 1 нафардан Ҳиндистон, Украина ва Грузия шахматчи қизларининг номлари келтирилган бўлса, рейтингнинг кучли тўртлиги айнан чин юрти вакилларига тегишли бўлди. Рейтинг пешқадамлигига Хоу Ифань (2633) эришган бўлса, Вэньцзюнь Цзюй (2561), Чжунъи Тан (2561), Тинцзе Лей(2552) кейинги поғоналарда кўриниш берди.

Ўзбекистон шахмат ишқибозлари учун қувонарли жиҳати, ёш қизлар ўртасида жаҳон чемпионлигига эришган Афруза Ҳамдамова 218 рейтинг очко жамғарган ҳолда ТОП-100 рўйхатга ўз номини муҳрлади.

Айтиш лозим, ортда қолган йил давомидаги мусобақаларда муваффақиятли иштирок этиб келган ёш шахматчи йигитларимиздан Жавоҳир Синдоров ёшлар рейтингида 3-ўринни эгаллади.

Шунингдек, ТОП-100лик рўйхатда ҳамюртларимиздан Муҳиддин Мадаминов (2521) 31, Муҳаммадзоҳид Суяров (2465) 68-қатордан жой эгаллади.

Ёш қизлар рейтингида Афруза Ҳамдамова(2354) 9, Умида Омонова(2228) 47, Гулдона Каримова(2200) 62-ўринларда қайд этилгани мамлакатимиз шахматчиларининг халқаро майдондаги натижалари янада ортиб бораётганини кўрсатмоқда.