Ўзбекистонда музейларга кириш ҳафтанинг қайси кунлари ва кимларга бепул?
Бугунги кунда республикамизда кўплаб музейлар фаолият юритмоқда. Музейдаги экспонатларни кўриш айниқса болаларда катта таассурот қолдиради. Шунингдек, музейлардаги маданий-мерос, ундаги ашёлар ва экспонатлар тарихимиз ҳақида тушунча ҳосил қилади. Хўш, фарзандларингиз билан ҳафтанинг қайси кунлари музейларга бориш маъқулроқ ва фойдалироқ?
Ўзбекистон Республикасининг “ Миллий музей фонди таркибига киритилган музей ашёлари ва музей коллекцияларини кириб кўриш тартиби ҳамда шартлари тўғрисида низом”нинг 6-бандига асосан:
Болалар ва ўсмирларнинг маданий-тарихий меросдан фойдаланиш ва улар билан танишиш имкониятини кенгайтириш мақсадида ҳафтанинг ҳар сешанба ва жума кунлари 18 ёшгача бўлган болалар ва уларга ҳамроҳлик қилувчи ота-оналар (ёки уларнинг ўрнини босувчи шахслар) Миллий музей фонди таркибига киритилган музей ашёлари ва музей коллекцияларини кириб кўриш учун давлат музейларига бепул киритилади.
Шунингдек, Низомда Миллий музей фонди таркибига киритилган музей ашёлари ва музей коллекцияларини кўриш учун ҳар йилнинг 2-8 сентябрь кунлари ташкиллаштирилган “Музейлар ҳафталиги” доирасида аҳоли давлат музейларига бепул киритилиши ҳам белгилаб қўйилган.
Давлат музейига 18 ёшга тўлмаган болалар ва аҳолининг бепул кириши ҳисобини юритиш Маданият вазирлиги томонидан тасдиқланган махсус журнал асосида амалга оширилади.
Музей ашёлари ва музей коллекцияларини ,жумладан, давлат музейларида турган музей ашёлари ва музей коллекцияларини бепул кириб кўриш тартиби ва шартлари билан боғлиқ қоидалари музей ҳудудининг ташриф буюрувчилар учун танишишга қулай бўлган жойига ўрнатилган бўлиши керак.
Manba: 7news.uz
