Ўзбекистон Хитой билан аграр соҳадаги ҳамкорликни кенгайтиради
Бугун Қишлоқ хўжалиги вазирлиги ҳузуридаги Шоличилик илмий-тадқиқот институтида институт раҳбарияти ҳамда Хитой Халқ Республикасининг Ҳуазҳонг қишлоқ хўжалиги университети делегацияси ўртасида учрашув бўлиб ўтди.
🗣 Учрашувда давлатимиз раҳбарининг жорий йил январ ойида Хитой Халқ Республикасига амалга оширган давлат ташрифи доирасида қишлоқ хўжалиги соҳасида эришилган икки томонлама ҳамкорлик масалалари, соҳада амалга оширилаётган кенг кўламли ислоҳотлар, икки мамлакат ўртасида яратилаётган имкониятлар ҳақида фикр алмашилди.
🏢 Ҳуазҳонг университети профессори Зҳанг Қифа университети ҳақида тўхталиб, унинг тарихи, жамоа таркиби, олиб борилаётган тадқиқот ишлари, эришилган натижалар, шоличилик соҳасининг икки давлат ўртасидаги истиқболлари билан ўртоқлашди.
🤝 Кейинги йилларда Ўзбекистон ва Хитой ўртасидаги ҳамкорлик муносабатлари барқарор тус олиб, икки давлат раҳбарларининг ўзаро ташрифлари ва учрашувлари натижасида янада мустаҳкамланиб, янги босқичга кўтарилиб бораётгани таъкидлаб ўтилди.
✅ Учрашув давомида аграр соҳа ва таълим йўналишида ҳамкорликда олиб борилаётган лойиҳаларнинг самарадорлиги, келгусида айнан аграр соҳада янги лойиҳаларни амалга ошириш имкониятлари ҳақида сўз юритилди.
