Ўзбекистон Республикаси Ташқи ишлар вазирлиги Афғонистондаги теракт юзасидан баёнот берди
"2022 йил 30 ноябрь куни Афғонистоннинг Саманган провинцияси Айбак шаҳрида содир этилган террорчилик хуружини кескин қоралаймиз. "Жиҳодия" мадрасасида амалга оширилган қабиҳ ҳаракат кўплаб инсонларнинг, асосан ёш талабаларнинг қурбон бўлишига олиб келди.
Яна бир бор шуни маълум қиламизки, бундай зўравонлик ҳаракатлари кескинликнинг кучайишига сабаб бўлиб, Афғонистонда барқарор ва узоқ муддатли тинчлик ўрнатишга, шунингдек, миллий келишувга эришишга тўсқинлик қилади", — дейилади вазирлик баёнотида.
Шунингдек, Ўзбекистон ТИВ ҳалок бўлганларнинг оила аъзоларига ҳамдардлик билдирди ва жароҳатланганларнинг тез фурсатда соғайиб кетишини тилади.
Теракт 30 ноябрь куни Афғонистоннинг Айбак шаҳрида содир этилди. Дастлабки маълумотларга кўра, терактда 23 киши ҳалок бўлган.
