Тошкент шаҳар суди томонидан тадбиркорга 55 172 254 сўм ундириб берилди
Гап шундаки, даъвогар “TRANSFER TAXI” МЧЖ Тошкент туманлараро иқтисодий судига даъво аризаси билан мурожаат қилиб, жавобгар “Xalq Sug’urta” АЖ ҳисобидан 55 172 254 сўм суғурта товонини ундиришни сўраган.
Даъвогар ва жавобгар ўртасида 2017 ва 2018 йилларда тузилган “гаровга кўйилаётган танспорт воситаларини суғурталаш” шартномасига асосан 3 та “Кобальт” транспорт воситалари суғурталанган.
Юқорида қайд этилган транспорт воситалари ЙТҲ натижасида зарар кўрган. Жумладан, транспорт воситасидан бири 2020 йил 10 октябрь куни, яна бири 2020 йил 13 октябрь куни ва учинчиси 2021 йил 20 июль кунлари ЙТҲга учраган. Мазкур ҳолатлар бўйича даъвогар суғурта товонини тўлаб беришни сўраб, жавобгарга ёзма равишда мурожаат қилган.
Жавобгар 2021 йил 2 августдаги хат билан “Кобальт” русумли транспорт воситаси билан содир бўлган ЙТХ тўғрисида суғурта ташкилотига кеч хабар берилгани, суғурта шартномасининг 8.3-бандига кўра 3 кундан кечиктирмай хабар бериш кераклиги, бу ҳодиса тўғрисида эса 9 ойдан сўнг хабар берилгани сабабли содир бўлган воқеа суғурта ҳодисаси ҳисобланмаслигини важ қилиб, суғурта товонини тўлашни рад этган.
Бундан ташқари, жавобгар 2022 йил 24 февральдаги хатда ҳам “Кобальт” билан содир бўлган ЙТҲ тўғрисида суғурта ташкилотига кеч – 1,5 ойдан сўнг хабар берилганлини сабабли содир бўлган воқеа суғурта ҳодисаси ҳисобланмаслигини важ қилиб суғурта товонини тўлашни рад этган.
Тошкент туманлараро иқтисодий судининг 2022 йил 16 июлдаги ҳал қилув қарори билан даъвогарнинг даъво аризаси тўлиқ қаноатлантирилган. Жавобгар ҳисобидан даъвогар фойдасига 55 172 254 сўм суғурта товонини ва 24 000 сўм почта харажатлари, республика бюджетига 1 103 445,08 сўм давлат божи ундирилган.
Жавобгар мазкур суд ҳужжатидан норози бўлиб, унинг устидан апелляция шикояти берган. Тошкент шаҳар судининг иқтисодий ишлар бўйича судлов ҳайъатининг 2022 йил 14 сентябрдаги қарори билан Тошкент туманлараро иқтисодий судининг 2022 йил 16 июлдаги ҳал қилув қарори ўзгаришсиз, апелляция шикояти эса қаноатлантирилмасдан қолдирилди.
Суд томонидан ҳуқуқлари яна бир бор тикланган тадбиркор Тошкент шаҳар судининг иқтисодий ишлар бўйича судлов ҳайъатига ўз миннатдорлигини билдирди.
