Тинчлик кенгашининг Ғазо секторини тиклаш бўйича 15 банддан иборат режаси эълон қилинди

Мазкур бандларни ўз ичига олган “Йўл харитаси” қоидалари БМТ Хавфсизлик Кенгашидаги брифингдан сўнг Тинчлик кенгашининг Ғазо бўйича олий вакили Николай Младенов томонидан эълон қилинди. Режанинг таркибий қисмлари қуйидагича тақсимланган:

1-банд: БМТ Хавфсизлик Кенгаши резолюцияси ва тинчлик режасига содиқлик;

2-банд: Олинган мажбуриятларни бажариш. Кейинги босқичга ўтишдан олдин томонлар ўт очишни тўхтатиш бўйича амалдаги келишув шартларини, жумладан, инсонпарварлик ёрдами, ёнилғи етказиб бериш, назорат-ўтказиш пунктлари фаолияти ва уй-жой масалаларини ҳал этиши шарт;

3-банд: Халқаро мониторинг. Ҳар бир кейинги босқич фақат ҳар икки томон ўз мажбуриятларини бажаргани текширилгандан кейингина ишга туширилиши керак;

4-банд: Ғазони бошқариш миллий қўмитаси (NCAG) Фаластиннинг вақтинчалик фуқаролик ҳокимиятига айланиши лозим. Халқаро тузилмалар хавфсизлик, қайта тиклаш ва фуқаролик бошқаруви масалаларида ёрдам беради;

5-банд: Ҳужжат қуролли тузилмаларни, жумладан ҲАМАСни бошқарув тизимидан ажратишни назарда тутади. Шу билан бирга, оддий давлат хизматчилари ва муниципал ходимлар жамоавий жазога тортилмаслиги керак;

6-банд: Фақат ваколатли Фаластин тузилмалари хавфсизлик функцияларини амалга ошириши ва қурол олиб юриши мумкин. Параллел қуролли тузилмалар ўз фаолиятини тўхтатиши шарт, жумладан, ҲАМАС ҳам;

7-банд: Полиция ислоҳоти;

8-банд: Босқичма-босқич қуролсизланиш. Қуроллар Исроилга эмас, NCAG бошқарувидаги Фаластин тузилмаларига берилади;

9-банд: Шахсий қуролни тартибга солиш;

10-банд: Шахсий қуролларни топшириш фақат тасдиқланган хавфсизлик кафолатларига эришилгандан кейингина амалга оширилади;

11-банд: Фаластинлик гуруҳлар ўртасидаги ички низолар, қуролли намойишлар, қасос ва зўравонликларни тақиқлаш;

12-банд: Исроил ва Фаластин ҳудудлари ўртасида гуманитар амалиётларни ҳимоя қилиш ва ўтиш даврини қўллаб-қувватлаш учун ҳудудга Халқаро барқарорлаштириш кучлари вақтинча жойлаштирилиши керак;

13-банд: Исроил қўшинларини Ғазодан олиб чиқиш босқичма-босқич амалга оширилади;

14-банд; Масъулиятни Фаластин ҳокимиятига топшириш. Тўлиқ демилитаризация қилинган ҳудудлардаги хавфсизлик аста-секин NCAG бошқарувидаги Фаластин фуқаролик тузилмалари назоратига ўтиши керак;

15-банд: Ғазони қайта тиклаш учун ҳудудда тинчлик бўлиши, расмий идоралар ишлаши ва ноқонуний қуролли гуруҳлар бўлмаслиги шарт.