Талабаларга берилган биринчи "мушт" ёхуд ётоқхонага жойлашиш учун ётиб олиш керакми?

Эрталаб ишга кетишда метрогача автобусда бордим. Метрода ҳам, пойтахт кўчаларида ҳам талабаларнинг шаҳарга қайтгани сезилди. Кўчалар ёшлар билан гавжум. Кимдир ўқишга кечикишдан қўрқади, кимдир янги либосидан мамнун ҳолда минг хил хаёлда манзилга отланган. Яна кимдир ўша телевизорлардаги катта аудиторияда ўқиётган талабалар орасида ўзини ҳис қилади.

Шунда бу йил Ўзбекистон санъат ва маданият институтининг талабаси бўлган жияним кўз олдимдан ўтди. Метрода чиқибоқ қўнғироқ қилдим. Билсам, ҳали ўқишни бошламабди, ишдан эса ётоқхонага жойлашиб олгунга қадар жавоб сўраган эмиш (Шартнома асосида ўқигани учун ярим стафкада нашриётда ишлайди).

Унинг айтишича, талабалар ота-оналари билан келиб, икки кундан буён ётоқхона олдида кўрпа-тўшак, идиш-товоқлари билан сарсон бўлиб, ўзини у ёқдан бу ёққа уриб, жой олиш илинжида юрганмиш. Ўзи ҳақида эса бошқа ҳеч нарса дея олмай йиғлаб юборди.

Кўнглим хавотирланиб ёнига бордим. Аҳвол эшитганимдан ҳам оғир. Кимдир қарининг гапига кирар, деб бувисини етаклаб олган, яна кимдир бобоси билан бири деканни, бири ётоқхона мудирини кутиб ўтирибди. Уларнинг олдига киргани билан нима ўзгарарди бир хил жавоб : “Ётоқхонада жой тугаган” (Аммо иккита катта бино бўм-бўш).

Мен ҳам навбатда туриб деканни кутдим. Навбатим келди, эшикни очдим, ётоқхона масаласида, деганимни биламан, “Жой қолмаган”, деган дангал жавоб олдим (Мени ҳам талаба, деб ўйлади, шекилли).

"Аввал биринчи курслар жойлашади, кейин сизларга навбат", деди. Жим, орқага чекиндим. Жияним иккинчи курс. Отаси оламдан ўтганлиги учун ётоқхонага имтиёзли жойлашиш учун рухсат олиб, ҳатто тўловларини ҳам қилишга улгурган. Аммо жойдан эса дарак йўқ.

Нима қилишни билмайсан, киши. Сени эшитадиган ёки тушунадиган одам йўқ. Не-не умидлар билан ўқишга келган талабанинг эса бунда ҳафсаласи пир бўлади. Аҳвол эса аллақачон ингичка узилиб йўғон чўзиладиган вақтга келган...

– Кеча кун бўйи кутдим, набирамни ётоқхонага жойлайман деб, аммо натижа бўлмади. Қизлар ётоқхонаси ёнида сирдарёлик, бухоролик ота-оналар билан тушгача ўтирдик, навбат кутдик, аммо қабул бўлмади, тушдан сўнг қабул қиламиз, деди. Биз эса кутиб ўтиравердик, лекин ётоқхона раҳбари бу ер тўлди, нариги ётоқхонадан жой берамиз, деб айтди. Аммо ундан ҳам жой ажратаман, демади. Биз эса кечгача кутдик. Бугун эрта тонгдан келиб, яна кутиб ўтирибман, – дейди Сатторова Ҳамида. – Натижа бўлмаса, қийналиб қоламиз, қиз бола учун ётоқхона ишончли, ижарага бошқа ерга қўямиз, десак, чўнтак кўтармайди. Қолаверса, набирам шартнома асосида ўқишга кирган...

– Ўтган йили ётоқхонага жойлашиш ҳам таниш-билишчилик бўлиб кетгани учун жой ололмаган эдим, – дейди Тошкент давлат ўзбек тили ва адабиёти институти талабаси Аҳмад Рустамов (исм ва фамилия ўзгартирилди) – Ётоқхонада жой бўла туриб жойлаша олмагандим. Янада алам қилгани битта телефон билан ётоқхонага жойлашиб олган курсдошларим ҳам бор. Энг қизиғи, икки йилдан буён бизнинг институтга ажратилган ётоқхонани бир қисмида ҳарбийлар яшайди. Ётоқхонада туришга ҳафсалам пир бўлган, ниятим ҳам йўқ. Бугун йўлим тушиб, шу тарафга ўтдим, яна шу ҳол, вилоятдан келган ота-оналар талаба фарзандларини ётоқхонага жойлай олмай кутиб ўтирибди. Улар нимани кутаётганини, ётоқхона топширувчилар эса нима учун куттираётганини билишмайди. Ҳар йили шу аҳвол. Бу ерда қандайдир сир борми, билмадим...

Айтишларича, талабалар шаҳарчасида ҳам талабалар ота-оналари билан янги қурилган “Ёшлик” сайлгоҳида “тунаб” қолаётган эмиш.

Талабаларнинг айтишича, Ўзбекистон давлат жаҳон тиллари университетида шу йил қабул кўпайгани учун ётоқхонада жой етмаслиги табиий ҳолга айланган. Аслида-чи, ҳолат қандай бўлиши керак? Ўқийман, деб келган талабалар учун барча шарт-шароитлар яратилиши керак эмасми? Биз бу мавзуга, ҳали қайтамиз!

Manba: uza.uz