Сурхондарёда аёл ва унинг келини эркаклар томонидан калтакланди
Сурхондарёда аёл ва унинг келини эркаклар томонидан калтакланди. Бу ҳақда Сурхондарё вилояти ИИБ хабар берди.
Маълум бўлишича, Санам Саломова (исм-фамилияси ўзгартирилган) устахонасини тўсиб, кўчма дўкон ўрнатиб олган қўшниси Муаттар Ражабовага вазиятни тушунтирмоқчи бўлди. Етмаганига одамлар ўтиб-қайтиб турган ариқ устидаги кўприкнинг устини бетонлаш учун қилаётган хатти-ҳаракатлари ҳам ғайриоддий туюлди.
Икки қўшни муросага кела олмади. Ёши каттаси каттаман, кичиги кичикман демай оғзаки ёвлашишди. Орага томонларнинг тарафкашлари қўшилгач, ур-сол, дўппослаш бошланиб кетди. Санамнинг акаси Салим ва маҳалладоши Сарвар Муаттар Ражабова ва келини Дилбарни ура бошлади. Кўрган кўзга уят эканини унутган қўшниларнинг тўполони маҳаллада яхшигина томошага айланди.
Якунда бир-бирини аямай, соч юлишиб, жанжаллашган қўшнилар ва уларнинг тарафкашларига икки йиллик озодликни чеклаш жазоси тайинланди.