Шаҳрисабзда "Telegram" каналига порнографик видеолар ташлаган ўқувчиларга чора кўрилди

Қашқадарё вилояти Шаҳрисабз туманида онлайн ўқув жараёни олиб бориладиган Telegram гуруҳига порнографик мазмундаги видео ва фото ташлаган ўқувчилар аниқланди, дея хабар бермоқда Постда.

Маълум қилинишича, Шаҳрисабз тумани Халқ таълим бўлимига қарашли мактаб ўқитувчиси Х.Д. туман ИИБ бошлиғи номига ариза билан мурожаат этди. Унда қайд этилишича, ўқитувчи ўзига тегишли бўлган телефон аппаратидан ўқувчиларини ўқитиш мақсадида Telegram мессенжерида алоҳида гуруҳ очган. Ушбу гуруҳда ўқувчиларга кунлик дарс вазифаларини бериб, онлайн ўқув жараёнини олиб борган.

Бироқ 5 сентябрь куни гуруҳга уланган телефон рақамидан турли порнографик видео ва фото материаллар ташланган.

Ҳолат юзасидан суриштирув ишлари олиб борилганида туманнинг «Оқолтин» МФЙда яшовчи фуқаро Ж.А. ушбу гуруҳда жияни бир неча ой олдин унинг қўл телефон аппаратидан фойдаланиб ўқиганлиги, шундан сўнг телефонида ушбу гуруҳ сақланиб қолганлиги ва ҳақиқатдан ҳам порнографик мазмундаги видеолавҳа ҳамда фотосуратларни ташлаганлиги маълум бўлди.

Бундан ташқари, онлайн тарзда ўқиб келаётган ўқувчилар Б.М., Р.А. ҳамда Ф.Ж. ҳам гуруҳга турли хил порнографик видео ва фотоматериаллар ташлагани аниқланди.

Мазкур ҳолат юзасидан фуқаро Ж.А. ҳамда бошқаларга нисбатан тўпланган ҳужжатлар маъмурий ишлар бўйича Шаҳрисабз туман судига юборилиб, тегишли чора кўрилди.