“Раққосаликка 200 доллар” – Андижонда боғча мудирасига ҳукм ўқилди

“Раққосаликка 200 доллар” – Андижонда боғча мудирасига ҳукм ўқилди

Андижон вилояти туманларининг бирида раққосалик штати учун ишга қабул қилиш эвазига фуқародан 200 доллар пора олган мактабгача таълим ташкилоти директорига ҳукм ўқилди. Бу ҳақда andijonnoma.uz’га вилоят суди матбуот хизмати маълум қилди.

Аниқланишича, фуқаро Г.Д. ўтган йилнинг ноябрь ойида мактабгача таълим ташкилоти директори Н.Р. ҳузурига иш сўраб боради. Мурожаатчи мулоқот чоғида ўзининг олий маълумотли эканини, мусиқа йўналиши бўйича дипломи борлигини билдиради. Директор хореография, яъни раққосалик штати учун бир нафар ходим зарурлигини, ана шу жойга ишга олиши мумкинлигини маълум қилиб, ҳужжатларни йиғиб келишини сўрайди. Суҳбат орасида фуқаро ишга жойлашиши эвазига бирор хизмат бўлса, тайёр эканини билдиради. Боғча мудираси эса ташкилот иссиқхонасини таъмирлаш кераклигини, шунга ҳомийлик қилишини писанда қилади.

Айни мулоқотдан икки кун ўтиб, Г.Д. ҳужжатлари билан бирга, 200 АҚШ доллари миқдоридаги маблағни директорга етказиб беради. Пулни ҳали сумкасига солиб улгармаган Н.Р. эса Иқтисодий жиноятларга қарши курашиш департаментининг туман бўлими ходимлари томонидан ўтказилган тезкор тадбирда, холис гувоҳлар иштирокида қўлга олинади.

Жиноят ишлари бўйича Улуғнор тумани суди раиси Шерзод Назиров раислигида кўриб чиқилган суд мажлисида ҳолатга атрофлича баҳо берилиб, Н.Р.га икки йил муддатга давлат иштирокидаги ташкилот ва муассасаларда мансабдорлик вазифаларида ишлаш ҳуқуқидан мосуво этган ҳолда 5 йил муддатга озодликдан маҳрум қилиш жазоси тайинланган.

Судланувчининг ҳукм ўқилган санага қадар эҳтиёт чораси тариқасида уй қамоғида сақланган кунлари тайинланган жазодан чегирилиб, 4 йил 10 ой 18 кун муддатга озодликдан маҳрум қилиш жазоси қолдирилган ҳамда унга нисбатан Жиноят кодексининг 72-моддаси татбиқ қилиниб, берилган жазо шартлига алмаштирилган ҳамда 2 йил синов муддати белгиланган.

Қайд этилишича, суд ҳукми билан Н.Р.га синов даврида бажарилиши лозим бўлган бир қатор мажбуриятлар ҳам юклатилган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!