Путин қачон Беларусда ядро қуроли жойлаштирилишини маълум қилди

Россия ядро қуролини Беларусда жойлаштириш 7-8 июль кунлари бошланади. Унгача зарур иншоотларни тайёрлаш жараёни якунланиши керак. Бу ҳақда Россия президенти Владимир Путин Сочида беларуслик ҳамкасби Александр Лукашенко билан норасмий учрашувда айтиб ўтди.

«Ҳаммаси режа бўйича кетмоқда. Биласизми, 7—8 июль кунлари тегишли объектларни тайёрлаш ишлари якунланади ва биз зудлик билан Беларус ҳудудида тегишли қурол турларини жойлаштириш бўйича чора-тадбирларни бошлаймиз», деди Россия давлат раҳбари.

25 май куни Беларус мудофаа вазири Виктор Хренин ва Россия мудофаа вазири Сергей Шойгу Минскда Россиянинг стратегик бўлмаган ядро қуролларини Беларус ҳудудидаги махсус омборхонада сақлаш тартибини белгиловчи ҳужжатларни имзолаган эди.

Хренин Минск Россия Федерацияси билан ҳарбий соҳада стратегик иттифоқчилик муносабатларини янада ривожлантиришдан манфаатдор эканини айтди. «Стратегик бўлмаган ядровий қуролларни жойлаштириш биз учун дўстона бўлмаган мамлакатларнинг агрессив сиёсатига самарали жавобдир», деди у.

Ўз навбатида, Россия мудофаа вазири Сергей Шойгунинг таъкидлашича, Россия Беларус ҳудудида стратегик бўлмаган ядро қуролларини жойлаштирса-да, «уларни назорат қилиш ва ундан фойдаланиш қарори Россия томонида қолади».