Ота хорижга чиқишдаги тақиқни ечиш учун 231 миллион сўм алимент тўлади

Ота хорижга чиқишдаги тақиқни ечиш учун 231 миллион сўм алимент тўлади

Фуқаролик ишлари бўйича судларнинг ижро ҳужжатларига асосан қарздор Н.Г.дан собиқ турмуш ўртоқлари ундирувчилар М.Д ва Ж.Э.ларнинг фойдасига тарбиясидаги жами 3 нафар фарзанднинг таъминоти учун улар вояга етгунига қадар алимент ундириш белгиланган.

Мазкур ижро ҳужжати Мажбурий ижро бюроси Қораўзак туман бўлими иш юритувига келиб тушган ва бўлим томонидан ижро ҳаракатларига киришилган.

Бош прокуратура ҳузуридаги МИБ ахборот хизматининг маълум қилишича, бўлим давлат ижрочиси томонидан Ўзбекистон Республикаси “Суд ҳужжатлари ва бошқа органлар ҳужжатларини ижро этиш тўғрисида”ги қонуннинг 421-моддасига асосан, қарздорнинг Ўзбекистон Республикасидан ташқарига чиқиш ҳуқуқига нисбатан чеклов ўрнатилган.

Бу орада фуқаро Н.Г.нинг Қозоғистонга бориш учун яхши имконияти бўлган, бироқ кетиш учун унга тақиқ борлиги режаларининг амалга ошишига тўсиқ бўлиб турган.

Шунда у Бюронинг Қораўзак туман бўлимига келиб, чет элга чиқишга зарурати борлигини билдирган.

Бўлим давлат ижрочилари унга Ўзбекистон Республикаси Вазирлар Маҳкамасининг 2018 йил 6 октябрдаги 808-сонли қарори билан тасдиқланган “Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисида”ги Низом талаблари ҳақида тушунтириш берган.

Қарздор ота ушбу қарор талабларига асосан ўзи томонидан келгусида тўланиши лозим бўлган 5 йиллик алимент пулларини олдиндан тўлаш истагини билдириб, ҳисоблаб чиқилган 132 миллион 95 минг сўм алимент пулларини собиқ турмуш ўртоғи Ж.Э.нинг банк пластик картасига ҳамда 99 миллион 75 сўмни яна бир собиқ хотини М.Д.нинг банк пластик картасига ўтказиб берган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!