Навальний «Матросская тишина» қамоқхонасидан бошқа жойга олиб кетилди
Россиялик сиёсатчи Алексей Навальний Москвадаги «Матросская тишина» тергов изоляторидан бошқа ерга кўчирилди. Бу ҳақда унинг адвокати Вадим Кобзевга асосланиб Meduza хабар берган.
«Навальний билан учрашиш учун тергов изоляторига келганимда унинг қамоқхонадан бошқа ерга кўчирилганини маълум қилишди. Мижозимнинг қаерга кўчирилганини менга айтишмади, эҳтимол колонияга олишгандир, балки бутунлай бошқа жойга олиб кетишган», — деган адвокат «Интерфакс» нашрига берган интервьюсида.
«Откритие медиа»даги изоҳда Кобзев Навальний колонияга етиб борганидан кейин унинг яқин қариндошларига қамоқхона жойлашган манзил ҳақида маълумот берилиши белгиланганини, бироқ бошқа манзилга кўчириш бир неча ҳафта давом этиши ҳам мумкинлигини қайд этган.
«Унинг ҳолатида бундай бўлмаслигига умид қиламан. Журналистлар ва умумжамоат кузатув комиссиясининг ёрдам беришига ишонамиз», — деган адвокат.
Умумжамоат кузатув кенгаши аъзоси Ева Меркачёва Навальнийнинг колонияга олиб кетилганини тасдиқлаган.
«Уни олиб кетишди, бироқ қайси қамоқхонага бориши ҳақида маълумотга эга эмасман», — деган Меркачёва.
Москванинг Симонов туманлараро суди 2 февралда Навальнийни «Ив Роше» иши бўйича айбдор деб топиб, унинг жазони колонияда ўташи ҳақида қарор чиқарганди. Москва шаҳар суди 20 февралда қарорни қонуний деб топди ва суд ҳукми кучга кирди.
Навальний колонияда 2,5 йил давомида суд белгилаган жазони ўтайди.
