NASA Марсда пайдо бўлган «камалак» юзасидан изоҳ берди
NASA олимлари Perseverance марсоходи томонидан юборилган Марсдаги камалакнинг фотосуратига изоҳ берди, деб ёзмоқда Tengrinews.
Аввалроқ Perseverance марсоходи Марсда камалакни суратга туширган эди. Ушбу камёб ҳодисанинг фотосурати NASA сайтида эълон қилинди. Тармоқ фойдаланувчилари уни муҳокама қила бошлади ва фотосуратда камера объективидаги оддий қуёш нурлари эканини таъкидлади.
Олимларнинг сўзларига кўра, Марсдаги сув миқдори Ерга таққослаганда минг баробар кам, шунинг учун Қизил сайёрада ёмғирдан кейинги оддий камалакнинг пайдо бўлиши мумкин эмас. Гап Марс ҳавосидаги чанг натижасида пайдо бўлган ғайриоддий камалак ҳақида кетмоқда.
NASA муҳандислари бунинг камалак эмас, балки шунчаки объектив линзаларининг махсус созланмасидан келиб чиққан тасвирлар эканини айтди. Агар қуёш нури тўғридан-тўғри смартфон камерасининг объективига тушса, шундай тасвирни кузатиш мумкин.
«Кўпчилик сўраяпти: бу Марсдаги камалакми? Йўқ. У ерда камалак бўлиши мумкин эмас», — дейилади NASA’нинг Twitter саҳифасидаги хабарда.
Марс ҳавосида сув буғлари Ер атмосферасига қараганда минг марта камроқ, шунинг учун у ерда камалак бўлиши мумкин эмас, деб хулоса берди муҳандислар.
Perseverance марсоходи 11 апрель куни синов парвозини амалга ошириши керак бўлган Ingenuity дрон-вертолётининг ишга туширилишига тайёргарлик кўрмоқда. Ingenuity бошқа сайёралар атмосферасидаги парвоз учун мўлжалланган, инсоният яратган биринчи учар қурилма ҳисобланади.
Аввалроқ архитектура иншоотлари билан шуғулланувчи ABIBOO студияси Марсдаги биринчи шаҳарнинг режасини тақдим этгани ҳақида хабар берилди. Ньюва номини олган шаҳарни Марсда 2054 йилдан 2100 йилга қадар қуриш режалаштирилган. У Темпа Менса тоғи яқинида жойлашади. Маҳаллий аҳоли уйлари кескин қияликка эга қояга қурилади. Бу уларни радиация ва тўғридан-тўғри тушувчи қуёш нурларидан ҳимоялайди.
