Мирзаобод тумани ҳокими Жонибек Яриев «ўтган йиллар учун» ёшлардан узр сўради
Мирзаобод тумани ҳокимлиги мажлислар залида бугун "Ҳоким ва ёшлар" учрашуви бўлиб ўтди. Унда сектор раҳбарлари, тумандаги мактабларда аъло баҳоларга ўқиётган жамоатчи ёшлар, оммавий ахборот воситалари вакиллари журналист ва блогерлар иштирок этди.
Туман ҳокими бугунги кунда ёшларга яратиб берилаётган шарт - шароитлар тўғрисида тушунтириш берар экан, ёшларни бугунги муаммолари ҳамда таклифлари билан ҳам танишди.
Мулоқот давомида ёшлар билан шу пайтгача яқиндан кам мулоқотда бўлганлиги учун туман ҳокими ёшлардан узр сўради. Ёшларнинг талаб ва таклифлари асосида мутасадди ташкилотлар раҳбарларига тавсиялар берилди.
Шунингдек, тадбир якунида Матбуот анжумани ҳам бўлиб ўтди. Оммавий ахборот воситалари вакиллари жойларга бориб ёшлар бандлиги ҳамда, ёшларнинг бўш вақтларини қандай ўтказаётганликлари билан танишиш жараёнида туғилган саволлари билан мурожаат қилдилар.
Туман ҳокими Жонибек Яриев барча саволларга атрофлича тушунтириш билан жавоб берар экан, бугунги ёшлар ҳамда ОАВ вакиллари билан бўлган самимий суҳбат кўп яхши ғояларга туртки бўлганлигини таъкидлаб ўтди.
Туман ҳокими учрашув сўнгида ёшларнинг яхши ўқиб билим олишга тарғиб этаркан, бу йил энг юқори ўрин билан Олий ўқув юртига кира олган ёшга
«Моноблок» охирги версиясини совға қилишини эълон қилди.
Мирзаобод тумани ҳокимлиги Ахборот хизмати
