Месси «Реал»да Роналдунинг ўрнини босиши мумкин бўлган ягона футболчи, аммо...
«Реал» президенти Флорентино Перес Криштиану Роналду кетганидан кейин жамоага янги ҳужумкор футболчи керак эканини таъкидлаганди. «Soccer.ru» сайти Мадрид жамоасига қайси футболчилар фойда келтириши мумкинлиги ҳақидаги мақолани чоп этди.
Роналдунинг трансфери кутилмаган бўлди. «Реал»нинг сиёсати ўзгардими ёки Флорентино Переснинг қарашларими? Боиси, шу пайтгача Мадрид клуби юлдуз футболчиларни таркибга жалб қилиш билан шуғулланганди. Фигу, Зидан, Роналдо, Кака ва Криштиануларнинг трансферлари фикримизнинг исботи. Перес юлдуз футболчилардан қачонки уларнинг фойдаси тегмай қолганида ёки жамоада бошқа етакчи пайдо бўла бошлаганидагина воз кечган. Бу сафар эса ҳаммаси бошқача. Роналду ҳамон энг кучли футболчилардан бири, ҳамон голлар урмоқда, қолаверса, «қироллик клуби» таркибида унинг ўрнини боса оладиган футболчи ҳали йўқ эди. Шу ҳолатда Перес португалиялик юлдузни иккиланмай сотиб юборди.
Бундан ташқари, «Реал» президенти биринчи бор ёзги трансферда йирик харидни амалга оширмади. Погба, Неймар ва Мбаппеларнинг харид қилиниши мумкинлиги борасида гап-сўзлар тарқалди, бироқ якунда Перес ҳеч кимни сотиб олмади. Эҳтимол, бундан буён режалар ўзгарар?..
Роберт Левандовски («Бавария»; Польша)
Левандовски бутун бошли карьерасини Бундеслигада ўтказмоқчи эмас, Перес эса бир неча йил олдин унга шартнома таклиф қилганди. Сабаби, Чемпионлар лигасининг аввалги мавсумларидан бирида Левандовски «Боруссия» сафида ўйнаб, «Реал» дарвозасига нақ 4 та гол киритган, ўшандан буён Переснинг қалбида польшалик ҳужумчига нисбатан «муҳаббат» пайдо бўлганди. Шу билан бирга Роналду чап қанот ҳужумида ўйнайди. «Реал» эса Рауль, Роналдо ва ван Нистелрой кетганидан кейин марказий ҳужумчига ёлчимай келяпти. Тўғри, Левандовски мундиалда яхши иштирок эта олмади, аммо бу унинг иқтидорли футболчи эканлигига соя сола олмайди.
Мауро Икарди («Интер»; Аргентина)
Икарди жаҳон чемпионатида умуман иштирок этмади ва бу бевосита Аргентина терма жамоаси етакчиси Лионель Месси билан боғлиқ. Месси Икардининг мундиалда иштирок этишини истамади ва якунда чиндан ҳам шундай бўлди. Аммо Месси Икардининг Ла Лигада ўйнашига тўсқинлик қила олмайди. Умуман, Мауронинг «Реал»да тўп суришига ҳеч қандай тўсиқ йўқ, агар Перес уни сотиб олишга жиддий қарор қилса, Икарди шу заҳоти «Реал» либосини кияди. Бироқ айни дамда «қироллик клуби» Икардига асосий эмас, захира вариант сифатида қарамоқда.
Пауло Дибала («Ювентус»; Аргентина)
Дибала — ёш ва иқтидорли футболчи. У «Ювентус»да бутун бошли тизимнинг бир қисми. «Реал»да эса у шахсий сифатларини кўрсатиш ва суперюлдузга айланиш имконига эга. Бироқ айни дамда Криштиану Роналдунинг «Ювентус»га ўтгани Дибалани Туринда қолишга ундаши мумкин. Чунки футболчининг кўнглида жамоасининг имкониятига бўлган ишонч ортган бўлиши эҳтимолдан ҳоли эмас. Аммо ҳаммаси Пересга боғлиқ, агар у Роналдунинг сотилгани эвазига «Ювентус»дан Дибалани трансферга қўйишни сўраса, вазият ўзгаради.
Эден Азар («Челси»; Бельгия)
Азарнинг «Реал»га ўтиши мумкинлигида ҳеч қандай муаммо йўқ. Бу борада ҳаммаси «Реал»нинг қўлида. Перес «Челси» раҳбарияти билан бафуржа гаплашиб олса, олам гулистон. Шунингдек, Флорентино Перес «Реал»га айнан Азар кераклигига ишонмоқда.
Антуан Гризманн («Атлетико»; Франция)
Имконсиз. Ҳеч қандай йўли йўқ! Тўғри, бу футболчи «Реал» учун жуда мос. Аммо унутмаслик керакки, Гризманн яқинда «Барселона» таклифини рад этди. Бошқа жамоага ўтмоқчи бўлгани учун эмас, шунчаки у Мадридда ҳамма нарсадан мамнун, «матрасчилар» раҳбарияти ва мухлислари уни қадрлашади. Қолаверса, Антуан ўта адолатли ва самимий инсон. Садоқатли футболчи. Шундан келиб чиқиб Гризманнинг «Реал»га ўтишини имконсиз иш дейиш мумкин. Аммо...
Харри Кейн («Тоттенхэм»; Англия)
«Реал»нинг ҳужум чизиғини кучайтириши мумкин бўлган футболчи айнан Кейндир. Чунки у айни дамда Левандовски каби ҳужумчилардан ҳам ва табиийки Бенземадан ҳам яхши ҳаракат қилмоқда. Бундан ташқари, Бэйл билан Кейннинг майдондаги ҳамкорлиги ажойиб кечади: бир тилда суҳбатлашадиган иккита футболчи майдонда фикрларини бир-бирига бемалол етаказа олади, масалан, Бэйл майдондаги ҳолатини ўзгартиришни истаб қолса, буни Кейн билан жуда яхши уддалайди. Гарчи «Тоттенхэм» раҳбарияти Кейннинг сотилмаслигини таъкидалаган бўлса-да, Перес «шпорлар»дан футболчи сотиб олиш бўйича яхши тажрибага эга — Бэйл 5 йил, Модрич эса 6 йилдан бери Мадридда.
Муҳаммад Салоҳ («Ливерпуль»; Египет)
Мисрлик футболчи ўтган мавсумда АПЛга келди ва ақл бовар қилмас натижаларни кўрсатди, иқтидори қай даражада эканини намоён қилди. У бу иқтидори билан тезлик ва рақобат камроқ бўлган Испанияда АПЛдагидан кўпроқ гол уриши мумкин. Аммо шуни ҳам таъкидлаш керакки, Муҳаммад Салоҳ 25 ёшида жуда тез юлдузга айланди. Эҳтимол, бу вақтинчалик ҳолатдир, яна ким билсин?
Килиан Мбаппе (ПСЖ; Франция)
19 ёшли футболчи жаҳон чемпионига айланиб улгурди. Қолаверса, Мбаппеда яқин вақт ичида дунё футболи юлдузига айланиш имкони мавжуд. Табиийки, «Реал» ҳам Мбаппени сотиб олишни истайди. Аммо франциялик ёш иқтидор эгаси «ПСЖ»дан ҳеч қаерга кетмаслигини таъкидлади. Париж клуби эса унинг сотилишига кичкинагина бўлса ҳам имкон қолдирмаслигини маълум қилди. «Пари Сен-Жермен» тушуниб турибди, бундай олмосни ҳеч қандай катта пулга ҳам сотиб бўлмайди.
Неймар (ПСЖ; Бразилия)
Неймар — «ПСЖ» сотишни истамаётган, аммо «Реал» жиддий қизиқаётган яна бир футболчи. Бразилиялик чарм тўп устаси «Барселона»дан даҳшатли сумма эвазига кетгач, яна Испанияга қайтишни хоҳлаб қолди, фақат бу сафар «Реал» сафига. Аммо ўшанда «ПСЖ» Неймарни сотмаганди. Аммо энди вазият бошқача. Агар Париж клуби жамоа ўйинини Килиан Мбаппе атрофида қуришни афзал кўрса, характери жуда оғир бўлган Неймардан қутулиш ҳақида ўйлаб қолиши мумкин.
Лионель Месси («Барселона»; Аргентина)
Чин маънода Лионель Месси бугун Роналдунинг ўрнини босиши мумкин бўлган ягона футболчи. Месси айни шу жиҳат туфайли ҳам мазкур рўйхатга киритилди. Бироқ футболда ҳамма нарса бўлиши мумкин. Мессининг товон пули 700 млн евро, дейсизми? Унутманг, яқин-яқингача Роналдунинг товон пули 1 миллиард евро эди, аммо уни «Реал» 100 млн евродан ошиқроқ суммага сотиб юборди. Кўрамиз, яна нималар бўларкин?
Manba: soccer.ru
