Маск Twitter платформасидаги бир неча янгиликларни эълон қилди
The New York Times хабарига кўра, миллиардернинг ижтимоий платформаси контент яратувчилардан фаол равишда даромад олади ва икки сегментни – видео ва бизнесни ривожлантиради. Ушбу йўналишда Tik-Tok асосий мўлжалга айланади.
Шунингдек, Маск Twitter орқали тўловларни амалга ошириш жараёнини ҳам ишга туширишни режалаштирмоқда. Фойдаланувчилар банк ҳисоб рақамига эга дебет карталарини аккаунтга улаш имконига эга бўлади.
Маск глобал мўлжал сифатида Хитойнинг WeChat ижтимоий медиа-платформасини олган. У одамларга нафақат турли маълумотларни кўриш, балки овқатга буюртма бериш ёки такси чақириш имконини беради. Хитойда дастурнинг миллионлаб фойдаланувчиси бор. Америкалик миллиардер ҳам Twitter имкон қадар кўпроқ функцияларни тақдим этишини хоҳлаяпти.
Илон Маск 28 октябрь куни ижтимоий платформани 44 миллиард долларга сотиб олди. Шундан сўнг, бир кун ичида Twitter ходимларининг ярмини, шу жумладан, директорлар кенгаши аъзоларини ишдан бўшатди.
Маск дарҳол ўзгаришларни амалга оширишга киришди. Жумладан, у янгиланган Twitter Blue обунасини тақдим этди. Шундан сўнг, ҳар бир киши ойига $8 эвазига верификацияни англатувчи «кўк белги»ни сотиб олиш имкониятига эга бўлди. Ушбу қарор туфайли платформада кўплаб машҳурларнинг сохта аккаунтлари пайдо бўлди.
