"Malibu 2" ва "Toyota land cruiser" автомашиналари аукционга қўйилмоқда

Одатда фуқаролар томонидан кредит тўловлари кредит шартномаларида белгиланган миқдорда ва муддатларда кредит ташкилотларига тўлаб борилади.

Шунингдек, айрим фуқаролар томонидан кредит тўловларини кечиктириш ёки тўлашни “унутиш” ҳолатлари ҳам кузатилади.

Жумладан, фуқаролик ишлари бўйича Миробод туманлараро судининг 2022 йил 26 октябрдаги ижро варақасига асосан қарздор Х.М.дан ундирувчи тижорат банки фойдасига 217 миллион 276 минг 469 сўм қарз ундириш тўғрисидаги ижро ҳужжати бўйича Бюронинг Мирзо Улуғбек туман бўлими давлат ижрочиси томонидан олиб борилган мажбурий ижро ҳаракатлари натижасида қарздорга тегишли “Malibu 2" русумли автотранспорт воситаси хатланди.

Худди шунингдек, фуқаролик ишлари бўйича Яккасарой туманлараро судининг ижро варақасига асосан қарздор У.О.дан ундирувчи АИТБ “Ипак йўли банк” Яккасарой филиали фойдасига 333 миллион 587 минг сўм ундириш тўғрисидаги ижро ҳужжати юзасидан Бюронинг Мирзо Улуғбек туман бўлими давлат ижрочиси томонидан олиб борилган ижро ҳаракатлари натижасида, қарздорга тегишли “Toyota land cruiser“ русумли автотранспорт воситаси хатланган.

Эндиликда, ушбу автотранспорт воситаларини электрон онлайн-аукцион савдолари орқали сотиш чоралари кўрилмоқда.