“М&Mʼs” қадоғига яширилган оғу

Қонунбузарлар ўзларининг нопок мақсадларини амалга ошириш йўлида киши хаёлига келмайдиган турли усуллардан фойдаланаётир. Ана шундай ҳолатлардан бири Тошкент шаҳрида юз берди.

Бир гуруҳ шахслар ҳуқуқни муҳофаза қилувчи орган ходимларини чалғитиш орқали ўз режаларини амалга оширмоқчи бўлди. Яъни тижорат мақсадида мунтазам равишда Туркия давлатига қатновчи ангренлик З.Р. бу сафар ўзи билан 38,78 грамм МДМА ҳамда 0,85 грамм метамфетамин гиёҳвандлик воситалари “М&Mʼs”ширинликларига яшириб қадоқланган ҳолда олиб келади. Божхона текшируви пайтида эса уни фарғоналик Х.А.га бераётган вақтида ҳуқуқни муҳофаза қилувчи орган ходимлари томонидан воқеа жойида қўлга олинди.

Олиб борилган суриштирув ишлари натижасида, ушбу гиёҳвандлик воситалари асли Фарғонанинг Қўқон шаҳрида яшовчи, ҳозирда Туркия давлатида бўлган М.А. томонидан Қўқон шаҳрида яшовчи Ш.П.га почта сифатида бериб юборилган экан. Ҳолат юзасидан жиноят иши қўзғатилиб, тергов ҳаракатлари давом эттирилмоқда.

Гувоҳи бўлганингиздек, ўз нафси йўлида ушбу заҳри қотилни юртимизга олиб кириш учун болаларнинг севимли ширинликларидан ҳам фойдаланишдан тоймаган бу кимсалар ўзларини қанчалар эҳтиёткор, деб билсалар, ҳуқуқни муҳофаза қилувчи орган ходимлари улардан ҳам ҳушёр аслида.

Айтиб ўтиш керакки, наркотик моддаларнинг ноқонуний айланмаси, транзити ва истеъмолига чек қўйиш мақсадида кенг кўламли ишлар амалга оширилмоқда. 26 июнь – Халқаро гиёҳвандликка ва гиёҳвандлик воситаларининг ноқонуний айланишига қарши кураш куни муносабати билан ҳамда Наркотик моддаларни назорат қилиш Давлат комиссияси томонидан тасдиқланган “Гиёҳвандликка қарши кураш ойлиги” доирасида республика ҳуқуқни муҳофаза қилиш идоралари томонидан ноқонуний муомаладан мусодара қилинган гиёҳвандлик воситаларини йўқ қилиш бўйича навбатдаги тадбир ўтказилди. Унда 1 тоннадан зиёд гиёҳвандлик воситалари ва турли хилдаги психотроп ҳамда психофаол моддалар ёқиб, йўқ қилинди.

2019 йилда ҳам наркотик моддалар ва уларнинг аналоглари ноқонуний айланмасига чек қўйиш борасида ҳам ички ишлар органлари ходимлари томонидан юксак масъулият ва эътибор билан иш олиб борилмоқда. Натижада ўтган 6 ой давомида 1,5 мингдан ортиқ шахс қўлга олиниб, уларни 313 килограммдан зиёд гиёҳвандлик воситалари далилий ашё сифатида олинди.

Бундан ташқари, жорий йил 1 майдан 30 июнга қадар Ўзбекистон Республикасининг барча ҳудудларида “Қора дори-2019” кенг қамровли тадбирининг биринчи босқичи ўтказилди. Унда республика бўйлаб барча ҳуқуқни муҳофаза қилувчи орган вакиллари, улар қаторида 9 мингдан ортиқ ички ишлар органлари ходимлари ҳамда 3,5 мингдан зиёд жамоатчилик, корхона, ташкилот ва ҳокимият вакиллари жалб қилинди. Наркотик моддаларни контрабандасини олдини олиш мақсадида, чегараолди ва тоғли ҳудудларда, шунингдек айланма йўлларда 361 та кўчма ҳаракатланувчи постлар ва 303 та тўсиқ гуруҳлари фаолият кўрсатмоқда.

“Қора дори-2019” кенг қамровли тадбирининг биринчи босқичи мобайнида республика бўйича гиёҳвандлик воситалари билан боғлиқ жами 1 минг 48 та ҳолат аниқланиб, жами 174 килограмм 987 грамм наркотик моддалар олинди.Шулардан наркотик моддаларни ўтказиш билан боғлиқ 251 та, таркибида гиёҳвандлик воситалари бўлган ўсимликларни етказиш билан боғлиқ 491 та жиноят фош этилди.

Шунингдек, тадбир давомида умумий 2 363 кв.м ер майдонида таркибида наркотик воситалари мавжуд ўсимликлар экиб етиштирилганлиги аниқланиб, йўқ қилинди.

“Қора дори - 2019” кенг қамровли тадбирининг биринчи босқичида вазирликнинг Гиёҳвандлик воситалари билан қонунга хилоф равишда муомала қилишга қарши курашиш бошқармаси ходимлари томонидан 25 кун мобайнида AS-532 русумли вертолётда амалга оширилган назоратли учишлар натижасида 84 та ҳолат аниқланиб, 348 кв.м. ер майдонида таркибида наркотик моддалари бўлган ўсимликларни етиштириш билан боғлиқ жиноятлар аниқланиб, ноқонуний муомаладан жами 9 килограммдан ортиқ наркотик моддалар олинди.

Қайд этилган рақамлар замирида ҳуқуқни муҳофаза қилувчи орган ходимларининг тинимсиз оғир меҳнати ва хизмати ётибди. Аммо мазкур натижалар билан хотиржамликка берилиб бўлмайди, чунки бу борадаги битта жиноят ҳам давлат ва жамиятнинг ривожига тўғоноқ бўлиши мумкин.

Айнан ушбу омиллар инобатга олинган ҳолда республикамиз ҳудудидаги катта миқдорда гиёҳвандлик воситаларини контрабандаси билан шуғулланаётган жиноий гуруҳларни, шунингдек таркибида гиёҳвандлик моддалари бўлган ўсимликларни етиштираётган шахсларни аниқлаш ва уларнинг жиноий фаолиятларига чек қўйишга қаратилган тезкор ишлар давом эттирилмоқда.

Мирзо Улуғбек МАДАЛИМОВ,

ИИВ Жамоатчилик ва ОАВ билан

алоқалар бошқармаси ходими.