Ислоҳотларни коррупциянинг чангалидан қутқаринг!
Коррупция – ниҳоятда ижтимоий-сиёсий вайронкор куч, унинг оқибатида миллий иқтисодиётга путур етади, ижтимоий тенгсизлик чуқурлашади, халқнинг давлат бошқаруви ҳокимияти органларига ишончи йўқолади, уюшган жиноятчилик кучаяди, жамиятда маънавият издан чиқа бошлайди. Шундай иллатларга қарши муросасиз курашиш, жамиятда ҳуқуқий маданиятни юксалтириш мақсадида Янги Наманган туманида тадбир ўтказилди. Унда, тиббиёт, таълим, мактабгача таълим ташкилоти раҳбар ходимлари иштирок этди.
Юртимизда олиб борилаётган ислоҳотлардан кўзланган мақсад халқимизни ҳаётдан рози қилиш. Энг муҳими, давлат идоралари бевосита халқ ичига кириб бориб, муаммолар билан танишаётгани ўзининг ижобий самарасини бермоқда. Албатта, бу жараёнда раҳбарларнинг масъулиятини ошириш ва ўзига билдирилаётган ишончни оқлаш ҳамда таъмагирликка йўл қўймаслик борасида кўплаб қарор ва фармонлар қабул қилинди. Олиб борилаётган кенг кўламли ишларга қарамай, минг афсуски, айрим ташкилот ва муассаса раҳбар ходимлари орасида коррупцияга берилиш, таъмагирлик ҳолатлари учраб турибди. Қонунларни билмаслик бирор кишини жазодан қутилишига баҳона бўлолмайди. Кимдир билиб, кимдир билмасдан деганларидек, бундай салбий иллатларнинг кўчасига кириб қолганликларини сезмай қоладилар.
Ачинарли томони шундаки, айрим нуфузли мансаб курсисида ўтирганлар била туриб коррупцияга, порахўрликка, таниш-билишчиликка берилиб кетаётгани ижтимоий ҳаётимизга жиддий хавф солмоқда. Шундай иллатларга қарши курашиш, коррупцияни барвақт олдини олиш мақсадида Янги Наманган тумани юридик хизмат кўрсатиш маркази томонидан “Коррупция тараққиёт кушандаси” мавзусида очиқ мулоқот ташкил этилди. Унда Жиноят ишлари бўйича Наманган шаҳар судининг судьяси ва туман адлия бўлими бошлиғи маъруза қилди.
Коррупция балосидан қутулиш, ислоҳотларни унинг чангалидан қутқариш шарафли бурчимиз эканлигини ҳамма бирдек тушунмоғи лозим. Акс ҳолда, ўзига тегишли хулоса чиқармай, порахўрлик ва таъмагирликдан тийила олмаётган шахслар жазога тортилиши муқаррар! Маърузада яқин 2-3 йил оралиғида коррупция ва шу билан боғлиқ жиноятлар сони ортаётгани, осон йўл билан бойишга бўлган уринишлар алалоқибат жиноят содир этиш билан тугаётгани аниқ мисоллар орқали тушунтирилди.
Адолатсизлик, қонунга ҳурматсизлик, касбу амалга, ишончга хиёнат қилиб бўлмаслигини ўқиб-уққан, порахўрлик ва коррупцияга, суиистеъмолчиликка қарши ўзида иммунитет ҳосил қилган одамнинг ишида унум, уйқусида ҳаловат бўлади. Таниш-билишчилик давлат ва жамият манфаатларига зиён етмаслиги, қонунларга, инсоннинг қадр-қимматига рахна солмаслиги керак. Ўзининг ғаразли мақсади учун ҳар қандай тубанликдан тап тортмайдиган масъул шахс, нафақат, ўзи ишлайдиган корхона ва муассасага, шу билан бир қаторда бутун жамиятга зиён етказади. Очиқ мулоқот давомида коруппцион жиноятлар содир этган шахс бир вақтнинг ўзида келажак авлоднинг илдизига ҳам болта уриши ҳақида мулоҳаза юритилди. Шунингдек, бундай иллатларга қарши муросасиз курашиш учун ҳуқуқий саводхонликни оширишга алоҳида эътибор қаратиш лозимлиги айтиб ўтилди.
Очиқ мулоқот сўнгида коррупцияга қарши курашиш ҳозирги даврнинг энг долзарб вазифаларидан бири эканлиги таъкидланди. Шунингдек, коррупция тузоғига тушиб қолмаслик, унинг ҳар қандай кўринишларига қарши кескин курашиш, давлат хизматчиси деган номга доғ туширмаслик, хизмат вазифаларини ҳалоллик ва масъулият билан бажариш лозимлиги айтиб ўтилди.
