Индонезиядаги 99 гумбазли масжид – диний туризм маркази ҳақида нималарни биласиз?
Индонезиянинг Сулавеси оролида жойлашган Асмаул Ҳусна масжиди ёки 99 гумбаз масжиди минтақа рамзларидан бири ва диний туризм маркази ҳисобланади.
Жанубий Сулавеси вилояти Макасар шаҳрида жойлашган масжид сайёҳлар энг кўп ташриф буюрадиган жойлардан бири ва шаҳарнинг рамзи ҳисобланади. Бу Сулавеси оролидаги энг катта мусулмон иншооти.
"Исломосфера" нашрига кўра, масжиднинг расмий номи Асмаул Ҳусна – "Аллоҳнинг энг буюк исмлари"га деб жаранглайди. 99 гумбаз Аллоҳнинг 99 исмининг рамзи ҳисобланади. Шу сабабли иморат 99 гумбазли масжид сифатида ҳам танилган. Унинг катталиги чеккаларидан марказга томон пасайиб борадиган кичиклари билан ўралган битта катта гумбаз тепасида жойлашган конусни ифодаловчи ўзгача архитектураси билан эътиборлидир. Бино дизайнидаги қизил, тўқ сариқ ва сариқ ранглар устувор бўлиб, бу Асмаул Ҳуснага жуда чирой беради. Архитектураси туфайли Индонезиядаги 10 та энг чиройли масжидлардан бири бўлиб, мамлакат ва хориждан кўплаб сайёҳларни ўзига жалб қилади.
Бино лойиҳаси муаллифи ҳозирда Ғарбий Ява ҳокими вазифасини эгаллаб турган сиёсатчи ва архитектор Ридван Комил ҳисобланади. "Асмаул Ҳусна"дан ташқари Ридван Комил Бандунг шаҳридаги "Ал-иршод" масжиди, Макасардаги Nipah савдо маркази, Пекин Ислом маркази масжиди, Банда Ачеҳ шаҳридаги Цунами музейи ва бошқа биноларни лойиҳалаштирган.
Бу масжиднинг қурилиши анча қимматга тушди. Турли манбалардан олинган хабарларга кўра, унинг қурилишига 182 миллиард индонезия рупияси сарфланди. Бундан ташқари, унинг кўп гумбазли тузилиши мураккаблиги туфайли, ниҳоят 2017 йилда очилгунга қадар бинонинг қурилиши узоқ вақт давом этди.
Асосий бино 72 х 45 метр майдонни қамраб олган бўлиб, у ҳам намоз ўқиш, ҳам дам олиш маскани бўлган очиқ майдон билан ўралган. Асмаул Ҳусна масжиди 13000 нафар намозхонларни ўз бағрига сиғдира олади. Унинг катта ҳажмига қарамай, у энергия тежамкор ҳисобланади, чунки унда табиий ёруғлик ва вентиляция қўлланилади.
Бино 3 қаватли бўлиб, унинг пастки қисми ертўладир. Унда таҳоратхона, жамғарма ва галерея офислари мавжуд. Биринчи қаватда эркаклар намозхонаси, денгиз кўринишини тақдим этувчи иккинчи қаватда эса аёллар намозни адо этадилар.
Масжид олдида хуфтон намозидан сўнг 30 дақиқага ёниб турадиган қўшимча ёритиш билан рақсга тушувчи фаввора бор.
Масжид қирғоқбўйида жойлашган. У қуёш ботаётган осмон фонида ажойиб кўринади. Тунда бино қўшимча ёритилади.
Ўзбекистон мусулмонлари идораси матбуот хизмати
