Иккинчи марта: Испанияда фавқулодда ҳолат 2021 йил ўртасигача узайтирилди
Испания парламенти мамлакатда коронавирусга чалиниш ҳолатлари кўпаяётгани сабабли ҳукумат киритган фавқулодда ҳолат режимини 2021 йил 9 майгача узайтиришни қўллаб-қувватлади.
Депутатлар ҳукуматнинг фавқулодда ҳолатни узайтириш таклифини қўллаб-қувватлашган ва бош вазир Педро Санчесга ҳар 2 ойда вазият бўйича ҳисобот бериш мажбуриятини юклашган.
Бундан ташқари, фавқулодда ҳолатни 2021 йил 9 март куни қайта кўриб чиқиб, уни бекор қилиш имконияти кўзда тутилган.
Испанияда фавқулодда ҳолат ҳукумат қарори билан 25 октябрда дастлаб 2 ҳафтага киритилганди. Шу билан бирга, уни парламент маъқуллови билан узайтириш режалаштирилганди.
Ушбу режим қатъий карантин чекловларини киритиш учун қабул қилинган. Жумладан, у билан соат 23дан соат 6гача комендантлик соати, ижтимоий алоқаларга чекловлар киритилиши ҳамда ҳаракатланиш чекланиши кўзда тутилган.
Испанияда фавқулодда ҳолат режими иккинчи марта киритилмоқда. Биринчи марта у 14 март куни киритилган ва ўшанда ҳозиргидан қатъийроқ чекловлар амал қилган.
Испания Европанинг касалланиш ҳолатлари сони миллиондан ошган биринчи давлати бўлди. Мамлакат бош вазирининг таъкидлашича, аслида касалланиш ҳолатлари 3 марта кўпроқ бўлиши мумкин.