Германия яна AstraZeneca вакцинасини қўллашдан воз кечди

Германиянинг Берлин штатида яна 60 ёшдан кичик бўлганларни AstraZeneca компаниясининг вакцинаси билан эмлаш тўхтатиб қўйилди. Бунга ушбу вакцинанинг қонда тромбларни ҳосил қилиши борасидаги хабарлар сабаб бўлган.

Берлин штатининг соғлиқни сақлаш раҳбари Дилек Калайчининг сешанба куни берган маълумотларига кўра, ушбу қарор эҳтиёт чораси сифатида қабул қилинган. Чунки мамлакатдаги тиббиётни назорат қилувчи ташкилот яқинда вакцинани олган одамларнинг 31 тасининг қонида тромблар ҳосил бўлгани ва уларнинг тўққиз таси вафот этгани ҳақида хабар берган.

Шунингдек,DPA ахборот агентлигининг маълум қилишича, Мюнхен шаҳрида ҳам 30 мартдан бошлаб 60 ёшдан кичик бўлганларни AstraZeneca вакцинасини билан эмлаш тўхтатилган.

«Ҳозирги ўзгаришлар туфайли Мюнхенда AstraZeneca билан 60 ёшдан кичик бўлганларни эмлаш эҳтиёт чораси сифатида тўхтатиб туришга қарор қилинди» дея Мюнхен ҳокимияти матбуот котибининг сўзларини келтиради DPА.

Германияда ҳозирга қадар 2.7 миллион дозадаги AstraZeneca вакцинаси қўлланилган бўлиб, ушбу дозалар билан асосан ўқитувчи ва шифокорлар эмланган.