Ғазонинг ҲАМАС назоратидаги Соғлиқни сақлаш вазирлиги Исроилни БМТ мактабига ҳужум қилганликда айбламоқда

Ғазонинг ҲАМАС назоратидаги Соғлиқни сақлаш вазирлигининг маълум қилишича, Исроил ҳарбийлари тинч аҳоли қўним топган Жабалия қочқинлар лагеридаги БМТ мактабига зарба берган. Натижада, тасдиқланмаган маълумотларга кўра, 50 дан ортиқ одам ҳалок бўлган.

Соғлиқни сақлаш вазирлиги вакили, шунингдек, лагерга уюштирилган яна бир ҳужумда бир оиланинг яна 32 аъзоси, жумладан, 19 бола ҳалок бўлганини қўшимча қилди.

Исроил бу айбловларга ҳозирча изоҳ бермади; ҳарбийлар мактабга зарба берилгани ҳақидаги хабарларни текшираётганини айтди.

Айни пайтда ижтимоий тармоқларда мактабга қилинган ҳужум оқибатлари акс этган видео пайдо бўлди. BBC нашрининг ёзишича, улар кадрларнинг геолокациясини аниқлай олган ва у ҳақиқатан ҳам мактаб жойлашган ҳудудда олинган. Бир ярим дақиқалик видеода турли қаватлардаги бир нечта хоналар акс этган, 20 га яқин ярадорлар, жумладан аёллар ва болалар ҳам қўлга олинган.

БМТ томонидан бошқариладиган мактаблар шимолда Ғазо аҳолиси томонидан бошпана сифатида фойдаланилади. Олдинроқ фаластинлик шифокорлар Хон-Юнисдаги кўп қаватли уйдаги иккита хонадонга берилган авиазарба натижасида 26 нафар фаластинлик ҳалок бўлганини хабар қилган эди. Исроил аввалроқ ҳудуд аҳолисини эҳтимолий ҳарбий ҳужум олдидан эвакуация қилишга чақирган.

Уруш шароитида BBC урушаётган томонлар расмийларининг баёнотларини тезда текшира олмайди.